Октябрьданул 30-31-нний Каспийскалий хьунтIий бур Дунияллул халкьуннал Каспийскаллал цифралул форум. Муний гьуртту хьунтIишиврул хIакъираву 326 заявка дуллуну дур Каспий хьхьирил региондалул билаятирттал вакилтурал ва властьрал федерал органнал каялувчитурал.

Цифралул лябуккулул министр Юрий ХIамзатовлул ккаккан дурунни форумрал программа, муний бувсун бур форумрай хьунтIий душиву цифралул трансформациялул, экологиялул мониторинграл, «Север-Юг» МТК-лул лябуккулул ва цаймигу масъаларттан хасъсса панельлал дискуссияртту ва стратегиялул сессияртту.
Мукунма пландалий бур дипфейкирдайн къаршисса ккуркки стол ва властьрал органнал давурттал мюнпат лавай бувансса масъалартту ххал бигьаву.

Форумрал лагрулий хьунтIий дур дунияллул халкьуннал хакатондалул финал, спортрал программированиялул Дагъусттаннал Кубок, дронну ссур даву, фиджитал-футболданул турнир ва «Цифралул спецназ» хоккейрал матч ва цаймигу мероприятияртту.Миннул сакиншинначиталну бур Аьрасатнал Цифралул министерство, Аьрасатнал МИД, Дагъусттаннал ХIукумат ва ООО «Цифровые форумы». Мероприятияртту хьунтIий дур Каспийск шагьрулийсса «Москва» КРЦ-ний.

ХI. Аьдилов