Лавгмур номерданий жу бувсъссия Расул ХIамзатовлул 100 шинал юбилейран хас дур­сса мероприятиярттал лагрулий Лак­рал театр байбивхьуну бушиву шаэрнал произведениярттаясса «Махъва-махъсса багьа» спектакльданущал (режи­ссер Дмитрий Павлов) гастроллай занай ва Къалмукьнал республикалийн хьусса тIайлабацIусса аьр­ххилия.
Ларгсса нюжмардийгу Лакрал театр зана хьунни ирглий­сса гастроллая – ва базилух Нальчик шагьрулия. Къабардин-Балкьарнал республикалийн гастроллай Лакрал театр хьхьичI­вагу лавгссар шамийлва. БувкIун бия Къабардин-Балкьарнавусса Дагъусттаннал диаспоралул вакилталгу.

Гастроллал лагрулий Аь. Шогенцуковлул цIанийсса Къабардиннал драмалул театрдануву хьунни пресс-конференция. Микку артистътурал бувсунни Санкт-Петербурглиясса режиссер Дмитрий Павловлущалсса даву сававну цала пишакаршиврул даража лавай хьушиву.
Театрданул жанахIраву Расул ХIамзатовлул архивравасса суратирттал ккаккия ххал дуллай бунува, Балкьарнал халкьуннал шаэр Къайсын Къулиевлущалсса суратрахгу буруглай, Къабардин-Балкьарнал шаэр,«Заман» кказитрал культуралул отделданул редактор Сакинат Мусукаевал бувсуна цина Расул ХIамзатов кIулну ивкIшиву ва ганал Къайсын Къулиевлущалсса цIакьсса дусшиврия.

– Расул ХIамзатов ччя-ччя­ни учIайва жул республикалийн. ДакIний ливчIуна Къайсын Къулиевлул юбилейрайн увкIсса чIумал Къабардиннал паччахIлугърал университетраву ганал лавхъун бивкIсса махъ.
Яла къалагай Расул ХIамзатов Къайсын Къулиев махъва-махъсса ххуллийн тIайла уккан увкIсса чIумалсса асарду. Кьакъадагьавай лачIлай дия гъарал. КIани-кIанттава нех дирхьуну най бия агьали. Расул ХIамзатов тIурча, уния сукку къахъанай, аьтIий авцIуну ия. Бюххансса махъгу лавхъуна. Гай, мяйжаннугу, цанная ца якъабуцайсса гьалмахтал бия. Оьрмулул личIи-личIисса тагьардаву ливчIсса чIумал цаннан цаннал кумаг байсса бия. Москавлив чичултрал съездрайн лавгсса чIумал мудан архIал бикIайва. Махъсса шиннардий Къайсын къашавай уну, Москавлив азарханалий усса чIумалгу, Расул ХIамзатов ганачIан ччя-ччяни лагайва.

Ттун ялагу дакIний ливчIунни Расул ХIамзатовлул хъярчру. Ганал дусшиву дия Балкьарнал чичу Аьлим Теппеевлущалгу.
– Жу фатиматический элмурдал докторталлу, – тIун икIайва, ганал хъачIрайх кагу руртун. Аьлим­лул кулпатран цIа дия Фатима, Расуллулмунингу Фатимат.
Ххирая ганан Чегем зун­ттуйн лахълан. Расул ХIамзатов Къабардин-Балкьарнал агьулданун хъинну маччасса инсанни.

Алена Чернова, Къабардин-Балкьарнал театр ххираминнал клубрал хъунмур:
– ХIакьину на хъинну ххарину бувкIра жула чIаххувсса рес­публикалиясса хъамал кка­ккан, вайннал спектакль ххал бан. Спектакль, байбивхьуну, къуртал хьунцIа хIайранну вичIи дирхьуну бивкIру сахIналия жунма баллалимуних. Вай гъалгъа тIий бия хIакьину жула гьарцаннал дакIния щин хIарчIсса кунма. Вай гъалгъа тIий бия хIакьинусса кьинилия, хIакьинусса буру­ккинттая.

Расул ХIамзатовлул «Кьурукьру» тIисса шеъри ккалли хьуну бур щалагу инсаниятрал дакьавринсса гимну. Ва спектакль ххал байхту, жуна Расул ХIамзатов аьч хьунни цIусса чулуха. Тамашачитал бия макь лихьлайгума – сахIналия баллалисса шеърирду бия хIакьинусса жула дакIнил хIалдануцIун бакьлакьисса. Гьарцагу хъамитайпалун бавунни Расул ХIамзатов чичлай ушиву ниттия, аьрщарая, ватандалия, ватандалул ххуллий жан дуллусса вирттаврая. Вай циняв асардугу чивчуну бур усттарну, бюхханну. Ттун хIакьину ххал хьунни режиссернал ва щала труппалул хъунмасса захIмат. Асар хъанай бия шаэрнал махъгу, зизлазисса хIавлул вичIал чIурдугу, лухIи лачакругу, макьаннугу. Вай цимур-ца оьвтIий дия дакьаврийн. РахIму бакъа нани­сса чIумуя бусласисса, тIикь-тIикь тIисса ссятрал чIунилгу жува пикри буллалли буллай буру. Къабардин-Балкьарнал тамашачитурал цIания хъунма­сса барчаллагь тIий бура Лакрал театрданул труппалухь, ва ххаллил­сса спектакль дунияллийн бу­ккан бансса гьунарданухлу, жун ккаккан ва спектакль лавсун бу­чIаврихлу.

Къабардин-Балкьарнавусса Дагъусттаннал диаспоралул хъунама Ибрагьим Сурхайхановлул барчаллагь увкунни Лакрал театрданул труппалухь, гастроллай бучIаврихлу. Гъурбатрай ялапар хъанахъисса лак ниттил мазрайсса спектакльлах мякьну бушивугу кIицI лавгун, маслихIат бунни лакку мазрайсса пьесагу лавсун бучIан.