![](https://ilchi.info/wp-content/uploads/2023/02/image-31-01-23-10-27-1-e1675501133236.jpeg)
Цалчинмур ЦIувкIуллал пагьламантурал наслулиясса Камил Маммаев дунияллийх цIа ларгсса ЦIувкIуллал пагьламаншиврул касму цIу дуккан дурсса жагьилли учирчагу, тIайлану хьунссар. Цайнува цува пагьламаншиврул сянатгу магьирну лархьхьуну, ванал пагьламаншиву сийлувун дагьан дунни. Ванал гьунардал цIа машгьур хьунни, Дагъусттаннай дакъагу, цайми регионнай, хIатта кьатIаллил билаятирттайгума.
Камиллул давурттал сияхI лахъисса дур. Дагъусттаннай туристътурал кьюкьри дусса кIанттурдайгу пагьламан лахълай, туристътурал дакIурдивун яргсса асарду багьансса давумур сайки гьар нюжмардийсса даву дур.
ЦIусса шинал байрандалул гьантрай Камиллул гьунарданул хIайран бунни Москавуллал агьлугу. Хаснува цIусса шинал хьхьуну хIат-хIисав дакъасса агьлу бувккун бия урчIамур канивусса ятIул ттугълищал хьхьуттайх лавхъун нанисса дагъусттанчу-пагьламаннай тамаша буван.
«ЦIусса шин хьунадакьав Ххувшаврил ттугълищал», – тIий чивчуна ванал цала телеграм-каналданий. Аьрасатнаву машгьурсса «Хьхьунил барцIру» тIисса мотоклубрал байк-центрданул программалийсса ванал номер бия «Ххувшаврил ппай» тIисса. Ва «Аьрасатнал мотоциклистътал» идаралул хъунаманал, «Хьхьунил барцIру» клуб хIасул бувманал ва каялувчинал Александр Залдастановлул (псевдоним Хирург) проектри. Цуппагу магьа хIисаврайсса. Январь зурул каникуллай байк-центрданийсса ва яргсса шоу хъинну машгьурну дия Москавуллал агьулданул дянив, муния буслайгу, чичлайгу бия социал сетирдай, ютубрай, СМИ-лул.
ЦIанакул, Украиннал аьрщарай аьралий ишру нанисса ппурттуву, совет аьралуннал ххувшавугу дакIнийн дуртун, Украинагу нацистътурацIа марцI буккан бувантIишиврийнсса вихшала цIакь даврицIун дахIлай бия хьхьуттайсса ятIул ттугълил лишангу.
«Байк-центрданийсса магьа оьруснал вирттавран хас бувсса магьари. Чара бакъа оьруснал ххувшаву ласунтIиссар. Ххувшаврил цIуку буккантIиссар!», – тIий ур Александр Хирург.
Ххувшаврил ттугъ пперхатIи буван вихшала бувну бур ЦIувкIуллал пагьламантурал вариснайн. Камил уттиния тийнайгу ва клубращал уртакьну зунтIий ур. Ва ялагу, ларгсса шин Камиллул оьрмулуву хьхьуттай Аьрасатнал ва дунияллул ссавруннайн гьаз хьусса шин дия учингу бучIир. Гьаваллавун гьаз хъанай, ялу-ялун машгьур хъанай ур, гъирарай зий ур, цIу-цIусса трюкру, увинтру хьхьуттай дуллай, хIайрангу буллай ур. Так ца ларгсса шинал зувинниха лирчусса проектру бартдиргьуну дур.
Ванал дурцири ва дуллалицири давурттал сияхI лахъисса дур. Дагъусттаннай туристътурал кьюкьри дусса кIанттурдайгу пагьламан лахълай, туристътурал дакIурдивун яргсса асарду багьансса давумур сайки гьар нюжмардийсса даву дур.
![](https://ilchi.info/wp-content/uploads/2023/02/2-e1675501210719.jpg)
– Гьай-гьай, пагьламанчинал даву тачIаврагу бигьасса къадиркIссар. Му лахьхьинна тIий кьаст лархIумагу хъинну дакI кьянкьасса, сивсусса икIан аьркинссар. Ттул ниттил ппу, уттигъанну дунияллия лавгсса цIанихсса зюннавчи МахIаммадагу (аьпа биву), пагьламан лахъултращал занай ивкIсса инсан ия, ваналгу, цайми хъуниминналгу цанма ккавкмуниясса, бавмуниясса хавардал ттувунгу ляличIисса шавкь рутайва. Гьарца кьини тIиссакссагу, на шяраваллил зумакъирагърайсса школалийсса пагьламан лахълан икIайссияв. Тараза сантирай ишла дуван, хьхьуттайх сивсуну шаттирду ласлан. Вардиш шайхту, яла ттун тараза дакъанура, каругу тIитIин дурну, хьхьуттайх лахълан лахьхьин ччан бивкIуна. ЦIувкIуллал къучагъсса пагьламантурал цIа хъиннура бюхттул дувансса чувшиву ттувура лякъин аьркинссар тIий, ттулва хьхьичI нава бурж бивхьуссия. Ва ялагу, на Дагъусттаннал тамансса шагьрурдай, районнай тамашачитурал хьхьичIун уккара. На так цIувкIуллал арс хIисаврай акъарахха гьунарду ккаккан буллалисса, лакрал миллатрал цIа дуруччин ва гьаз дуванна на хьхьуттайн гьаз шайсса. Тамашалийми ххарину, гурну хъатру ришлан бивкIукун, ттулламур дакIгу ххаришиврул дуцIай, – тIий ур Камил.
Аьрасатнал рекордирттал луттирайн ванал цIа ласунсса даврихагу зий бур. Лайкьссар. Ца цувалусса пагьламан шяраваллил пагьламантурал цIа, ягу дурну, гьазгу дуллай ур . Барчаллагьрихха. ТIайлабацIу баннав вин, гьаваллал виричу, ттул шяравучу Камил Маммаев!
Суратру Камиллул телеграмм-каналдания https://t.me/balance05