Вай гьантрай Дагъусттаннал ХIукуматрал председательнал цалчинма хъиривчунан кIанайсса Батир Эмеев хьунаавкьунни ца региондалия цамунийн инсантал бувцуну заназисса шупиртуращал.
Хьунабакьаву хьунни ДР-лул Транспортрал ва ххуллул хозяйствалул министерствалий. Шикку гьуртту хьунни ведомствалул хъунама Ширухан ХIажимурадов, Дагъусттаннал ГИБДД-лул управлениялул хъунаманал хъиривчу Мурад ХIусманов, Дагъусттаннал Ространснадзорданул управлениялул хъунаманал хъиривчунан кIанайсса Муслим Аьбдулмуслимов. БатIаврий ихтилат хьунни Къалмукьнаву хьусса авариялия.
Октябрь зурул 24-нний МахIачкъалалия Санкт-Петербурглив нанисса автобус КАМАЗ-райн щуну, 6 инсан ивкIунни. Миннава ца чIивисса оьрчI ур.
Хьунабакьаврил хIасиллу дуллай, цинявппа цалийн бувкIунни: ца региондалия цамунийн заназисса щупиртурал ялув бацIаву гуж дан. «Ччясса чIумул мутталий сакин бантIиссар автостанцияртту ва перевозчиктурал компанияртту ххал дуллансса группа. Вайннал ххал буллантIиссар цукун дуручлай бурив инсантал ца кIаная ца кIанайн бувцуну заназиминнаясса тIалавшиннарду, транспортрал тагьар. Мукунма ххал бантIиссар ххуллийн укканнин щупирнал медосмотр дурну дурив. Вай тIалавшиннарду дурурччуну дакъахьурча, дихьлантIиссар аьк1ри», – увкунни Батир Эмеевлул.
Ширухан ХIажимурадовлул ххи бунни транспортраву тахографру ва ГЛОНАСС системарду дишин аьркиншиву. «Миннул кумаграцIух компаниялул каялувчинаща зузалтрал хъирив бацIан хьунтIиссар», – увкунни ванал.