![](https://ilchi.info/wp-content/uploads/2021/11/perepis_kkul2.jpg)
Гьарца кIанай кунна, Ккуллал райондалийсса шяраваллавугу перепись дайдирхьунни. Ванил хIакъиравусса цIуххаву дуван на хьунаавкьура Ккуллал райондалийсса Дагстатрал зузала Апанниев Зубаирдущал ва хасну переписьрал ялув авцIусса вакил Амиров МахIаммад-Рамазаннущал. Вана вайннал бувсмур:
– Перепись дайдирхьуссар райондалий, вайми Аьрасатнал шагьрурдай ва шяраваллаву кунна, октябрь зурул 15-нний. Лахъи лагантIиссар ноябрь зурул 14-ннийнин. Перепись дуллай уссар 16 инсан. Вай ххал буллалисса 3 контролергу уссар. Перепись дуван бюхълахъиссар МФЦ-лийгу, «Госуслуги» тIисса программалийнугу. Райондалий дуллалисса переписьрал комиссиялул председательну уссар райондалул бакIчинал хъиривчу ХIусманов Ажуб. Перепись дуллай буссар планшетрайн лахъан дурсса электрон журалул анкеталийну. Аьмну инсантурахьхьун буллалисса суаллу бур 40. СияхIрайн ласласисса инсанная тIалав къабуллалиссар цукунчIавсса цIа-бакI чирчусса чагъарду. Анжагъ цала зумух бувсмурди анкеталийн ласласисса. Мукунма идарарттай зузисса инсантурал 70 % буржлув бувну бур Госуслугилул программалийну перепись дуван. Перепись дуваврил ялув бацIаву хъуннасса дур. Переписчикнал цала планшетрайн лавсъсса инсантурал сияхI га цIана наниссар контролернал планшетрайн. ВаначIатугу наниссар гьарца кьини дурсса сияхI Дагстатрайн.
На яла лавгссияв МФЦ-лийн, гикку перепись дуллалисса иширах ябитан. Гиккун увкIманал перепись дуллай бия Оьмариева Рамина. Мукуна на лавгссияв Ваччиял администрациялийсса участокрайнгу. Микку му иширалсса буллай бия Мадаева Роза.
Умуд бур циняв жула инсантал сияхIрайн ласуншиврийн.
![](https://ilchi.info/wp-content/uploads/2021/11/perepis_kkul3.jpg)
![](https://ilchi.info/wp-content/uploads/2021/11/perepis_kkul1.jpg)