ДР-лул Халкьуннал Мажлисрал председатель Заур Аскандаров лаивзунни республикалул ялапарлувтурайн Ватандалул дазул кьатIув цала къуллугърал бурж бартбигьлай бивкIсса Аьрасатлувтурал аьпалул кьини.
«ХIурмат лавайсса аьралийтал-интернационалистътал!
Барча тIий ура зухь жула билаятрал тарихраву хьусса агьамсса иш – Ватандалул дазул кьатIув къуллугърал бурж бартбигьлай бивкIсса Аьрасатлувтурал аьпалул кьини! Зул бакIрачIан чIявусса бувкIссар, чIярусса захIматшивуртту дурхIуссар, амма зу дакI марцIну биттур бувссар Ватандалул зуйнма бувсса амру. Зул гьунар хъанахъиссар саллатIнал чувшиврул ва хIакьсса патриотшиврул эбратну. Къучагъшиврул ва виричушиврул чIун тачIавгу къалагайссар ва гьарца чIумал му хIурматрай диркIссар. Жу зуйн барчаллагьрай буссару аьраличунал ва инсаншиврул буржирайн дакI тIайлашиврухлу.
ХIакьинусса кьини зуха лавхьхьусса хьун ччай бур хасъсса аьралий операциялий гьуртту хъанахъисса дагъусттанлувталгу. Зу хъанахъиссару Ватандалуха къуллугъ баврил яргсса эбратну.
На зухь барчаллагь тIутIиссара Дагъусттаннал жагьилтал рувхIанийну, мяърипатрайну ва патриотшиврийну тарбия бавриву чялишну гьуртту шаврихлу.
ЧIа тIий ура зун цIуллушиву, тIайлабацIуртту ва хъиншивуртту!» – тIий бур лаизаврий.
ХI. Аьдилов
