Декабрьданул 21-нний МахIачкъалалив, Дусшиврул къатраву, «Ас-Салам» кказитрал 30 шинал юбилей дунни. Ваний гьуртту хьунни национал политикалул ва диндалул иширттал министр Энрик Муслимов, Дагъусттаннал муфтинал хъиривчу МухIаммад МахIаммадов, муфтинал маслихIатчи Айна ХIамзатова, динийсса ва жяматийсса ккураннал вакилтал.
Мероприятие дайдирхьуна МахIачкъалаллал Хъун мизитрал мудун МухIаммадаьрип МахIаммадовлул Мубараксса Кьурандалул сурарду буккаврия. Энрик Муслимовлул, Дагъусттаннал бакIчи Сергей Меликовлул цIания бавтIциригу барча бувну, кIицI лавгуна кказитрал хъунмасса бутIа бихьлахьишиву, республикалий бакъа, щалва Аьрасатнавугу дин-мяърипат лахьхьин даврил ххуллий. Айна ХIамзатовал бувсунни, цуппа ва кказитрай зузисса ппурттуву цуку-цукунсса захIматшивуртту диркIссарив давриву. Бахшишру дуллунни кказитрал циняв редактортуран.
ДакIнин бутан, щалвагу Аьрасатнал лагрулийсса «Ас-Салам» кказит 1994-кусса шиная шинмай дунияллийн буккайссар. Цуппагу 13 мазрай итабакьайссар. Бусанна вай гьантрай ва кказитрал подписка даврил хIасиллу дуллай, цалчинмур кIану бушиву Лакрал райондалухь. Укун подписка хьхьичIуннай шаву хъунама редактор ачIи лаккучу ушивруцIунгу бахIлай бур даврил уртакьтал. Кказитрал хъунама редактор ХIасан МахIмудовлул нину Карашатусса дур. Лакку мазраймур кказитрал редактор ур Ися Оьмаров, ванаяту жу бувсъссия «Илчилий».
Жугу дакIнийхтуну барча буллай буру «Ас-Салам» кказитрал редакциялул коллектив ва буккулт, хаснува лакку мазраймур кказитралми. Вайгу жущалва архIал ниттил маз ябаврил ххуллий хъар ларсъсса уртакьтал бухьувкун. ЧIа тIий буру давриву тIайлабацIу ва цIу-цIусса хьхьичIуннайшивуртту!
ПатIимат Рамазанова
