Спортрал дунияллий космосрал бюхттулшиврийсса иш. Нью-Йорк. Ислам МахIачев Австралиянал спортсмен Джек Делла Маддаленащал талатаврил ринграйн увккун, ххув хьуну, UFC-лул цIусса мухIлу ларсунни дянивсса кIушиврул дивизиондалий. Уттинин ларсмур мухIлу чурххал куклусса дивизиондалийя. Гьаннайсса, МахIачев Аьрасатнаву кIийлла UFC-лул мухIлу цалчин ларсмари.
Ва кьини Дагъусттаннал агьлу, дунияллийциригу укунма бухьунссия, кIюрххила бивзуну, телевизордах, Ислам ринграйн укканнин, яржа бияннин ялугьлай бия. Мукун ялугьлагьиминнавух бивкIра нагу. Найбунува мукIру хьунна, спортрая архсса инсанна, октагондалий биллай, батлай булукьайминналгу муттаэра, затгу къабувчIай, амма ттунгума найбунува чIалай бия Маддалена Исламлущал къалаяйшиву.
«Ух хьун ацIайма акъассара» тIисса Маддаленал хъунмур чIун ларгуна, Исламлул лув увтукун (кIийла-шамийла), запIа тIи бувсса закунттал, гъаралуннища ххассал хьун хIарачатрай. Ттуршлий кьуйлла рищаву дурсса Ислам ххув къашайссияв? Ххюрагу раундрал хIасиллайн бувну, циняв судьятурал махъ ца бувну, Ислам ххув хьушиву баян бувна. Пахру къабагьансса иш бакъая. Ххаришиврул ци-дунугу хъиншиву щин-дунугу дан ччай бия ттунгума. Спортрая космосрал манзилданий архсса душнин.
Ислам цувава ххира къахьунсса жагьил акъар.
ХьхьичIун урувгсса, адаврай къуццу тIисса, хъунисса хьхьичIуннайшивуртту ларсъсса ухьурчагу, пахру-ххара бакъа къуццу тIутIисса. Яла экспертътурава цуманаллив угу-увкунахха, тачIав Ислам гукун цува ххари хьушиву ккаккан буллайгума къаккавкссар куну. Ттунна яла-яла ххуй дизаймур ванаву ци дур учирча, лакку мазрайсса гъалгъа. Ва жагьилтурал, оьрчIал кумир ур. Ванал зумувсса ниттил мазрайсса гъалгъалул хъунмасса бияла буссар оьрчIан ва жагьилтуран ниттил маз кIулну бикIан аьркиншиврул пропаганда хIисаврай. КIилчингу, Лакку улча ххирасса ушиву. Вагур жагьилтурансса ва оьрчIансса ккаккиялунсса хасият. ЯбацIансса , цIа дансса хасиятрур къалиян къаучайсса ва хIанттищал цичIав иш бакъасса ушивугу. Иман дусса ушивугу. Дурккусса, кIулшивурттал хъирив агьсса ушивугу. ДакIний бур, ванахь цIувххуна интервьюраву, Американавун левххун нанийни, лахъисса ххуллу бялахъан буван киносуратру ххал дуллан икIарав куну. Исламлул бувсуна цува личIину киносуратру ххал дуллан гъира бусса акъашиву, луттирду ккалан икIайшиву.
Ххув хьуну махъ Исламлул Дагъусттангу, Аьрасатгу бюхттул буллалисса патриот оьвчаву дунни: « Жулва билаят яла цIакь бумурди! Жулла республика яла цIакь бумурди! Яла гужми биюлт жулвамири!». Вай патриот калимарду оьрчIаву, жагьилтураву ва хIатта оьрмулул хъуниминнавугума патриот асарду цIакь бувансса дарсирдал кIанттайссар.
Цумур чулуха бургарчангурив, ванал спортрал дунияллийсса гьунаргу бюхттулссар. Дуллу дунияллий ва спортрал журалул кIилийнусса чемпионтал увагу 10 уссар. Ми цинявгу щалла дунияллий машгьурсса цIардур, лигалул бусалардур: Конор Макгрегор, Даниэль Кормье, Алекс Перейра, Аманда Нунес, Би Джей Пенн, Жорж Сен- Пьер, Генри Сехудо, Рэнди Кутюр, Джон Джонс, Илия Топурия …ва утти Ислам МахIачевгу.
Турнирданий кIирагу мухIлу дунияллийх цIа ларгсса чемпион ХIабиб НурмахIаммадовлул Исламлул хъачIунттайн руртунни цал, яла цувагу хъачIунттайн гьаз унни. Вагу чемпионнал хIурмат бушиврул лишан, ца команда. МахIачевлул тренер Хавьер Мендеслул ТАСС-рал журналистнахьхьун дуллусса интервьюраву угу-увкунни, Исламлул ххувшавриву ванайн хъуннасса вихшала дирхьуну ивкIсса тренер Аьбдулманап НурмахIаммадовлул бутIагу бушиву.
«Ва Аьбдулманаплул пландалул хIасиллур. Ислам иян хъинну хIадурну ия», – увкунни ванал, гьарца чулуха хIадур хьуну ия, хIатта арснайн ХIабиблуйннияргума Исламлуйн вихшала дия тIий. Аьбдулманап Исламлул оьрчIниявасса тренерди. ДакIнин бутанну, 2020 шинал, коронавирусраща ххассал къавхьуну дунияллия лавгшиву ва. Аьпа баннав!
Ислам барча унни Дагъусттаннал бакIчи Сергей Меликовлул:
«Дагъусттаннал дянивсса кIушиврул UFC-лул цалчинма чемпионни Ислам МахIачев. Ванал цIунилгу цала цIа чирчунни дунияллул спортрал тарихраву, мяйла ххув хьусса чемпионнаяр ххув хьуну. Жула ватандалул арснал уттинин Аьрасатнал цаягу спортсменнал къабувмур бунни – кIира дивизиондалий ххув хьунни.
Сисаврил, хьхьичI бивхьусса мурад бартбигьин хъит тIутIаврил, бюхъу-хIарачатрал хIасиллал кабавкьуну ва куклумур категориялува увккун, илданун ккаккан бунни, ччан бикIарча, хIарачат барча, мурадрайн иян спортсменнан цукунчIавсса дазурду къадикIайшиву». Вава мяъна-мурадрайсса ххуттардийну барча унни Дагъусттаннал парламентрал каялувчи Заур Аскандаровлулгу.
«Ва ххувшаву Исламлул хасият, вихшала дишин кIулшиву ва хьхьичIунай ачин чялиш уккаву ккаккан дуллалисса давур. Цала наставник Аьбдулманап НурмахIаммадовлул аьпалул хIурмат лахъну бушивугу ккаккан буллалисса».
МахIачкъалаллал мэр Жамбулат Салавов: «Жува пахрулий буру Исламлул муттаэнал чулухунмайсса хIурмат ккаккан баврия ва хIакьсса спортсменнал хасият, дух дусса ушиврия».
Машгьурсса телеведущий ва комментатор Дмитрий Губерниев: «Цуксса къаххуйри ХIабиб НурмахIаммадовлуя ливчуну мукьах жулва билаятрай хIакьсса чемпион ва миллионнайсса агьалинал кумир ушиву. МахIачев ринграйн уккайхту, ванай щаллагу дунияллийцири тамаша бувну бия».
Триумфрая махъ Исламлул увкумур
«Ва ттул хиялли. Щалва оьрму вай кIира мухIулттувур. Ва лахIзалулшиврий на хъинну захIмат бувссар. Вай хъинну кIусса дур, дунугу, ттун ххуй дизлай дур. Нью-Йорк, барчаллагь! Заннайн хъарашав, ттул оьрму баххана хьуссар, ацIаву дакъа ххюра раундрай уккан хъанай ура, иллан хъанай ура ттуна ччикун, хьхьичI бивхьусса мурадрайн икъавнугу къаацIанссияв. Ва данди уккавугу бигьасса хьусса, на мунилшиврий биялсса захIмат бивхьунутIийри. Ттул план кьюлтIсса дакъассар, циняв муттаэтуран муния хавар буссар, щищачIав на ацIан увангу къашайссара. Дональд Трамп, ачу, тIитIа КIяла Къатта, на най ура!»
Явара, МахIачевлул, США-нал президентнал къуллугърайн цIа рищунна тIисса пикри бакъар ва. ХьхьичIва Американал президент Трамплул баян бувна, 2026 шинал, UFC-лул турнир тIайланна КIяла Къатлул хIаятраву дуванна куну. МахIачевлул гьимгу, КIяла Къатлувугу бияврийн уккан хIадурну ура тIиссар.
Экспертътурал пикрирду
Эдуард Вартанян, ММА-лул талатала:
«Данди буккаву гужсса дия, анжагъ талатаву, лачIун буккаву дакъанутIийча, рищаву дунутIий. МахIачевлул муттаэнал ччаннацIухсса бувна, лажингу мадара кьутI дурна. МахIачев рищавриву цIакьсса ия, ххуйну хIадур хьуну ия. УнутIий, хIасиллугу ххувшаврил ххуттайсса».
Олег Тактаров, UFC-лул Аьрасатнал цалчинма чемпион:
«Гьарзат гъалатI бакъа дунни Исламлул, компьютер куна зий ия. МахIачев цIанакул цинявннаяр за кIулсса ур. Къулагъас дувардув, цукун дакIнийхтуну ххари хъанай ивкIссарив. Ттун цалчинни МахIачевлул тукунсса асарду ккавкссагу. Маддаленая цIа данна багьавай, мяйжаннугу багьайкун, кIулну уручлай ия цува. БакI бугьан, бириян ацIлай ия , тIайлассар, яламуниву ххуйну хIарачат буллай ия».
Дарья Железнякова, UFC- лул боец:
«На хIайранну бура, хIайран буванну иллайгу ивкIунни Ислам. Ххюрагу раундрай – тотальное доминирование дия.ТIайлассар, шамилчинмур раундрайва бансса ххива МаддаленацIухсса. Барча уллай бура кIира мухIулттул заллу!».
Асланбаг Бадаев, АСА-лул вице-президент:
«Ттувун Исламлул ххуйсса асарду бивчунни. Ккаккиялунсса, идеальнайсса даву дунни. Муттаэнан ххув хьунсса сант къаританну. Ххувшаву бигьасса къадикIайссар, ххувшавричIансса ххуллу захIматссар. ТIайлану цалва гьунар, бюхъу ишла буван хIадур хьуну икIан аьркинссар. Мукуннийри духхайссагу. Ххаллилсса ххувшаву дия».
ПатIимат Рамазанова
