ЦIуссалакрал райондалий хьунни Аьрасатнал ПаччахIлугърал Ттугълил кьинилун хас дурсса «Аьрасатнал триколор» акция. Ва хьунни райондалул жямат лагма лаган бувсса унгу-унгусса байран.

Мероприятиялул сакиншинначину бия райондалул Культуралул, жагьилтурал политикалул, спортрал ва туризмалул управление. ПаччахIлугърал Ттугълил байран хьунни Ватандалухсса ччаврия, жула аьдатру ядан аьркиншиврия цал ххишалану дакIнин бутансса ишну. Акциялул программалуву агьамсса кIану бувгьунни дакI цIуцIисса, гьавас бусса жагьилсса волонтертурал. Райондалул кIичIирттавух лавгун, личIи-личIисса идарарттайн бувкIун, вайннал бавчIунни Аьрасатнал Ттугълил рангру дусса 200-ннийн бивсса лентарду. Жяматрал барчаллагьрай кьамул дунни бусравсса сувенирду. Мюрщиминнахь волонтертурал бувсунни акциялия, Ттугълил тарихрая.
Райондалул школардайгу хьунни ва кьинилун хас дурсса мероприятияртту. «Аьрасатнал чIавахьултту»» тIисса щалагу Аьрасатнал акциялул лагрулий школардал чIавахьултту чIюлу бунни байрандалул лишаннай. «Аьрасатнал Ттугъ» акциялул лагрулий хьунни билаятрал гимнрахун ПаччахIлугърал Ттугъ гьаз буллалисса линейкарду. Мукунна хьунни байрандалун хас дурсса флешмобру, классрал ссятру ва выставкартту. «Ватандалул рангру» тIисса акциялул лагрулий сакин бувну бия творчествалул мастер-классру. ОьрчIал дунни ттугълил рангирдайсса аппликациярду, суратру ва паннорду. Хьунни мукунна «Аьрасатнал лишанну» тIисса гербрал, гимнрал ва ттугълил тарихрал кIулшивуртту ххал дуллалисса интерактивсса викторина. Укунсса мероприятиярттахь хъунмасса бияла бур ялун нанисса ник ватан ххирану, паччахIлугърал лишаннал хIурмат буну , Аьрасатнал бучIантIимунил жаваблувшинна дуну тарбия бавриву.

Андриана Аьбдуллаева