Ва нюжмардий Расул ХIамзатовлул цIанийсса Литературалул музейраву хьунни Дагъусттаннал Чичултрал союзрал лакрал литературалул секциялул ирглийсса заседание.
Ваний гьаз бувна Дагъусттаннал халкьуннал чичу Мирза Давыдовлул юбилейрацIун бавхIусса, мукунма Чичултрал союзрал 90 шинал юбилейрайнсса хIадуршиндарацIун бавхIусса масъалартту.
Лакрал секциялул каялувчи Супиян Оьмаровлул бувсуна, Чичултрал союзрал юбилейрал хьунин «Дагъусттаннал чичулт» тIисса, цIу буккан бувсса справочник итабакьлай бушиву, вара юбилейрацIун бавхIуну лакрал чичултгу Аьрасатнал Чичултрал союзрал чулухасса бахшиширттан ккаккан бувантIишиву. Секциялий агьамсса масъалартту гьаз бувна цалва ихтилатирттаву халкьуннал чичулт Мирза Давыдовлул ва Хизри Илиясовлул, Аьбдуссалам Магьдиевлул, Бахттун Гъазиевал ва Аминат АхIмадовал. Дагъусттаннал Чичултрал союзрал председатель Марина АхIмадова-Колюбакинал Аьрасатнал Чичултрал союзравун цIуну кьамул бувсса Ханича Аьлиевахьхьун ва Аминат АхIмадовахьхьун буллуна союзрал члентурал билетру. ДакIнийхтуну барча буллай буру кIивагу, чIа тIий буру цIу-цIусса произведенияртту чичлансса гъирагу, цIуллушивугу. Аминат «Илчилул» ччяниявасса зузалар, Ханичагу чIун-чIумуй назмурдугу, макьаларттугу кказитрай дуккайсса авторди.
ПатIимат Рамазанова
