Дагъусттан Республикалул Культуралул профсоюзирттал комитетрал председатель, политикалул элмурдал доктор Марзижат Буттаевал бувсунни «Память гор» тIисса, аьралитуран кумаг баву мурадрайсса сипталул хIакъиравусса цила пикри.
– ХIакьинусса кьини хасъсса аьралий операциялий гьуртту хъанахъисса аьралитурал чIарав бацIаву мурадрайсса сиптарду, ххувшаву гъан дуван хьхьичIунмай ласласисса шаттирдур. Жула арсру, ласру, хIатта душругума, куннал кув буручлай, куннал кув мюхчан буллай, талай бур фашизмалул мархха бухлаган буллай. Жува уттинингу тасттикь бувссар оьсса душман ххит ан бюхъайшиву ва уттигу бантIиссар. ХIакьину, ххувшаву гъан дуллай, аьралитурал дакIру дуллай, шаймур буллай бур цинявппагу жула агьали, хIатта оьрчIрува бур открыткартту, ссайгъатру гьан буллай, цивппагу чIарав бушиву буслай.
Аьралитурал сипталийну хIасул дуллалисса «Память гор» организациялул гуж ва бияла хъунмасса бикIантIиссар. Ва идаралул, аьралитурал масъалартту щаллу баву бакъассагу, щавурду дирсса аьралитал хъин бансса кумаг буллантIиссар. Идаралул вакилтурал дуклаки оьрчIащал ва студентътуращал дуллантIиссар патриот зумунусса насихIатру буллалисса хьунабакьавуртту.
«Память гор» тIисса организация хIасул даву мурадрайсса сипталуцIун авкьуну ур Дагъусттаннал бакIчи Сергей Меликов. Ванал бувсуна республикалул шагьрурду ва районну хIала духхан аьркиншиву ва идаралул давривух. КIицI лавгуна, идара хIасул бувну махъ пикрилий бушиву СВО-лийсса аьралитуран кумаг бавриха зунсса жяматийсса идарарттал Ассоциация сакин дансса, – увкуна Марзижат Буттаевал.
Имара Саидова
