Апрельданул 11-нний Аьрасатнал ПаччахIлугърал Думалул депутат, Жамалуттин ХIасановлул ирглийсса даврил аьрххи хьунни Ккуллал райондалийн.
Депутатнал аьрххи байбивхьуна Буттал кIанттул цIанийсса Хъунмасса дяъвилул, 1999-ку шинал дяъвилул, социалист захIматрал ва хасъсса аьралий операциялий Ватандалул мурадру буручлай бивкIсса Вирттаврал аллеялийсса аьпалул улттуцI тIутIив дишаврийну.
Хъирив Жамалуттин ХIасанов райондалул администрациялул къатраву хьунаавкьунни шяраваллал бакIчитуращал. ЦIухху-бусу бунни цукунсса масъаларттащал хьунабакьлай буссарив райондалул жямат. Къулагъасрайн лавсунни райондалул социал-экономикалул ва «Единая Россия» партиялул программалул цаппара сферардавусса хьхьичI ххуттай бивхьусса масъалартту дузрайн буккан баву. Гьарица сукку бувсса масъалалул хIакъираву депутатнал бунни хасъсса маслихIатру, бувсунни ми дузал баврил ялув ацIантIишиву.
Зунттал щархъавунсса аьрххилул лагрулий Жамалуттин ХIасанов хьунаавкьунни хасъсса аьралий операциялий жанну дуллусса аьралитурал ниттихъащал ва кулпатирттащал. Ниттихъал дакIру данмур буллай, кIицI лавгунни цала чулуха шайсса кумаг бан хIадурну ушиву.
– Хасъсса аьралий операциялий къучагъну талатисса арсру тарбия бувсса ниттихъулгу Вирттавран ккаллиссар. Зул арсурваврал, ласурваврал жанну дуллуссар Ватандалул мурадру, мюхчаншиву ва цашиву дуручлай, ялун нанисса никиран паракьатсса оьрму дузал буллай. Жун мудангу дакIний дикIантIиссар вайннал чувшиву, тачIавгу къакьабитантIиссару зу къулагъас дакъа, – увкунни депутатнал.
Ккуллал райондалул бакIчи Шамил Рамазановлул Жамалуттин ХIасановлухь барчаллагь увкунни райондалул жяматрах дурсса къулагъасрахлу.
