Жу уттинингу цимилгу чивчуссия ЧIяйннал шяравасса Бадуржигьан Рамазановал Украиннаву Аьрасатнал билаятрал мурадру бартбигьлай талатиминнан гуманитар кумаг тIайла буккайшиврия.
Хасъсса операция байбивхьуния шинмай аьралийтураха аякьа дуллай, кумагру буллайнма бур Бадуржигьан. Ванил аьралийтуран буллалисса кумаг ххаралунсса бакъарча, дакIнийхтунусса бур. Бадуржигьаннун цила дуллалисса давурттая щинчIав кIул хьуну ччан къабикIай.
Вай гьантрай соцсетирдаву цинявннан ккаркхьунссар Бадуржигьаннул аьралийтуран тIайла буклакисса авадансса ссайгъатирттал суратру ва видео.
Букъавсун къабучIир, сахаватлувсса, дугърисса давуртту дуллалисса хъамитайпа цIуллушиврулгу цIакьсса бакъашиву, оьрмулулгу жагьилсса бакъашиву. Вай кумагругу ванил цила пенсиялуцIух буллай бушиву.
Ва ххуллухьгу, жула оьрчIаха дуаьрдугу дурну, Бадуржигьаннул аьралийтуран 50 килограмм бакъухърал, 20 ххунча аьрайн-гьавккурттал бувну бия. Бакъухъгу, цила зумуну, нахIу-нацIурду дирхьуну, чIюлу бувну бия. ДачIра ххюттуйн зумув бивхьуну хъинссар тIий чивчуну бия чассагул кьуцурттай. Машан ларсун дия нахIура-нахIусса нис. НицIавух лагавугу, туртгу хIала бувну, бакьин бувну бия вивра. Бакъухъ, аьрайн-гьавккури жула ужагъирттай дуллангума бигьа бакъасса дукрарду дур. Бадуржигьаннул, кIу къабивзун, хьхьуния кьини дурну, жула оьрчIру ххари баву мурадрай дурну дия лакку дукрарду.
Мукунна машан ларсун дия ахъвазандалул сокрал упаковкартту, чассагул къуршив, чайлул пачкарду. Дуки-хIачIиялийну гьашиву къадурну, аьралийтуран гьан дунни гъилисса жуларду, полотенцартту. Ванил ссайгъатирттаву бивхьунни цIуллуну-сагъну зана хьуннав жула аьралийтал тIисса дуаьрду дусса чагъарду.
Бадуржигьаннул яхI-къириятрая ва чумартсса тIуллая кIул хьуну, ванищал хIала-гьурттуну зий бур «Народный фронтрал» Дагъусттаннайсса отделениялул, «Великая община» тIисса жяматийсса суккушиндарал вакилтал.
«Хасъсса аьралий операциялиясса видео ххал дуллалийни, ниттихъал дакIру къума лаглан дикIай. ЧIалай бур жула аьралийтал захIматшивурттахьхьун мадад къабуллуну, хъуннасса хъар лахълай бушиву.
Ттуща къабювхъунни ва ххуллухьгу ттула чулуха кумаг къабувну бацIан. Жула оьрчIан ичIаллил дукра хъамакъадитаншиврул, шартIру дакъасса кIанттурдай ккашилну къабикIаншиврул, пикри хьунни, дукангу нахIусса, чурххангу бузсса аслийсса лакку дукрарду дурну тIайла дуккансса. Жувагу дакI цIуцIаву дуну бушиву, тайннал буруккинттарай бушиву ккаккан буван ччан бикIай. КIулну бикIийча цумур-цагу ниттил дакIнил гъилишивугу, чанигу Ватандалул мурадру буручлачисса цинявппагу аьралитуран цачIушиву. Циняв жагьилтал цIуллуну-сагъну шаппай занахьуннав, дяъвилул цIу лещаннав», – тIий бур Бадуржигьан.
Мяйжаннугу, ванил хасиятгу виричунал дур, цуппагу виричусса бур. Укунсса ниттихъул махъ буссаксса, ххувшаву ласунсса вихшалагу хъиннура цIакь хъанай дур. Жула халкьуннал дугъришиврул, ка-кумаг бан хIадуршиврул, вайннал дуллалисса чумартсса тIуллал дакI дуллай дур ва гьавас бутлай бур аьралийтуравун.
Ниттил дуллалисса даврицIун кабакьу буллай, Бадуржигьаннул арснал Саэдлулгу арцуйнусса кумаг тIайла бувккунни аьралийтуран.
Вай цимурца диян дан лавгссар «Великая община» тIисса жяматийсса суккушиндарал президент МахIаммад Мусаев.
Вай гьантрай аьралийтурал Бадуржигьаннуйн дуркIунни: «Бивуннни жучIан ина гьан бувсса нахIува-нахIусса ссайгъатру. Ина кунма чумартсса инсантурал дуллалисса давурттан багьа бакъассар. Жугу хъамакъабивтун, ссайгъатру хIадур буллай бивкIсса вин цIуллушиву дулуннав. Барчаллагь вил мусил каруннан», – тIисса видеообращение.
Шиккува дакIнин бутан, хасъсса аьралий операциялул гьурттучитуран кумаг буллалаврихлу Бадуржигьан лайкь хьуссар «Команда Путина» тIисса премиялун, Халкьуннал фронтрал чулухасса наградарттан, Аьрасатнал ДУМ-рал «За заслуги» тIисса медальданун ва Дагъусттаннал бакIчинал Барчаллагьрал чагъарданун.
Имара Саидова
