Лакрал райондалул администрациялий хьунни райондалул бакIчи Юсуп МахIаммадовлул контрактрай аьралий бурж биттур буллай, хасъсса аьралий операциялия кутIасса чIумуй игьалаган увкIсса Буршиял шяравасса Артур Халидовлущалсса хьунабакьаву. Артур аьралий бурж биттур буллай усса ур Запорожскаллал областьрайсса Бердянск шагьрулий.

Хьунабакьаврий гьуртту хьунни Буршиял шяраваллил бакIчи Амсар МахIачевгу.
Юсуп МахIаммадовлул барчаллагь увкунни аьраличунахь чувшиврухлу, ватандалул хьхьичI бивхьусса бурж дакI тIайлану биттур буллай ушиврухлу, жула билаятрал мюхчаншиву дуруччаврил ххуллий талай ушиврийгу чIурчIав ду­ллай.
«Инагу, вил аьралий гьалмахтуралгу дакIнин бутлати­ссар ва оьрмулуву жунна яла аьркинмур ялув даркьусса ссав душиву. Вил эбратрал жагьилтуравунгу гьавас бутлати­ссар. Жун зуя хъунмасса пахру бу­ссар ва мудангу хIадурну ­бу­ссару зулгу, зул кулпатир­тталгу чIарав бацIан», – увкунни Юсуп МахIаммадовлул.
Аьраличунал бувсунни цала къуллугърая, архIал талатиминная, хасъсса аьралий операциялий дагъусттанлувтурал ккаккан дуллалисса къучагъшивурттая.