Итникьини МахIачкъалалив хьунни Дагъусттаннал чичу, шаэр, публицист, таржумачи, литературовед, аьралий корреспондент Апанни Къапиев дунияллийн увккун 115 шин бартлаглагисса юбилей.
Юбилейрал мероприятияртту дайдирхьунни ДР-лул Культуралул министерствалул къатрал хьхьичI дацIан дурсса Апанни Къапиевлул гьайкалдануцI тIутIив дишаврийну. Шикку гьуртту хьунни ДР-лул культуралул министр Зарема Буттаева, Лакрал театрданул каялувчи Бадрижат МахIаммадхIажиева, Аьрасатнал Чичултрал союзрал Дагъусттанналмур отделениялул хъунмур Миясат Муслимова, магьирлугърал ишккаккулт, чичулт, Дагъусттаннал театрдал артистътал.
Вара кьини шаэрнал цIа ларсун нанисса Лакрал театрдануву хьунни Апанни Къапиевлул юбилейран хас бувсса мажлис.
Театрданул жанахIраву дия шаэрнал оьрмулия ва творчествалия бусласисса суратирттал выставка.
Шаэр, чичу, таржумачи, аьралий корреспондент Апанни Къапиев дакIнин утан бувкIун бия республикалул магьирлугърал ишккаккулт, чичулт, театрдал артистътал, жяматийсса организациярттал вакилтал, студентътал ва дуклаки оьрчIру.
Мажлис байбишин хьхьичI тамашачитуран ккаккан дуруна «Жизнь, прожитая набело» тIисса шаэрнан хас дурсса документал фильм.
Муния махъ республикалул культуралул министр Зарема Буттаевал кIицI лавгуна шаэрнал караматсса кьадар ва творчество ккаллину душиву Дагъусттаннал магьирлугърал тарихраву хьусса ца ляличIисса иширан.
«Чичул бувтун бур къалахъисса бунугу, хъинну яргсса, творчествалул авадансса ххуллу. Революция, граждан дяъви, цIусса республика хIасул шаву, Буттал КIанттул цIанийсса Хъунмасса дяъви – вай жула билаятрал бувхIусса гьарца заманалул бухкIуллив бивзун бур ша Апанни Къапиевлулгу», – увкунни министнал.
Зарема Буттаевал тIимунийн бувну, хIакьину Аьрасатнал бакIрачIан цIунилгу захIматсса чIун дуркIсса ппурттуву, хасъсса аьралий операция нанисса чIумал, Апанни Къапиевлул проза ва поэзия жунма баллай бур цува сагъну ивкIсса заманнай кунма агьамну ва бюхханну.
Министрнал кIицI лавгунни юбилейрал шинал лагрулий республикалий най бушиву творчествалул конкурсру, культурно-просветительский ва кIулшиву дулаврил мероприятияртту: республикалул Миллатрал музейрал выставкарттал проект «Судьбы моего поколения» ва Дагъусттаннал Ссихьрал театрданул сакин бувсса Республикалул шеърирду буккаврил 27-мур конкурс; «Культура» миллатрал проектрал лагрулий Лакрал райондалий хьусса лакрал шеърирдал ва музыкалул фестиваль.
Ччясса мутталий социал медиалуву итабакьин тIий бур Апанни Къапиевлул аьралий чичрурду ккалаккисса литературный флешмоб «И так, в бой!».
Юбилейрал шин къуртал хьунцIа дан дакIний бур «Песни горца» тIисса Республикалул фестиваль.
«Щала дунияллийва бюхттулну бур Апанни Къапиевлул творчествалул кьимат. Ванал произведенияртту цимилагу итабавкьуну бур Польшанаву ва Чехиянаву. Автор талатаврил майданнив уруглагисса хханссар ялтту, инсаннал къюву кьюлтI тIутIисса ябитаврийну. Ванал чичрурдаву бур дяъвилиясса, цала ватан дуручлачисса инсантурал хасиятрал кьуватраясса хIакьмур», – увкунни Миясат Муслимовал.
Дагъусттаннал Чичултрал союзрал Лакрал секциялул хъунама Супиян Оьмаровлул бувсунни Апанни Къапиев ивкIшиву жула республикалий Чичултрал союз сакин даврил бакIщаращуй. КIицI лавгунни ванал тIиртIуну душиву Аьрасатнал литературалуву Дагъусттаннал хьхьичIунсса шаэртурал ХIамзат ЦIадассал, МахIмудлул, Сулайман Стальскийл, АбутIалиб Гъапуровлул, Оьмарла Батырайл цIарду.
Муния махъ Лакрал театрданул артистътурал ккаккан бунни Апанни Къапиевлул аьралий чичрурду гьануну ларсун, Аьрасатнал магьирлугърал ишккакку Ислам Къазиевлул бивхьусса «Невыплаканные слезы» тIисса спектакль. Ванил премьера хьуссар 2015-ку шинал, бюхттулсса Ххувшаву ларсун 70 шин шаврил юбилейран хасну.
Зулайхат Тахакьаева
