Буттал кIанттул цIанийсса Хъун дяъвилий Ххувшаву ларсун 80 шин хъанахъисса юбилей, Совет Союзрал кIийла Виричу, вас-ццах къакIулсса, бусалардавун агьсса лётчик АхIмад-Хан Султаннул юбилейрайнгу тIайла дацIлацIисса шин хъанай дур.
Октябрь зурул 25-нний 1920 шинал увсса Виричунан гьашину 105 шин хъанахъиссар. АхIмад-Хан Султаннул цукунсса гьунарду бувссарив дяъвилий цинявннан кIулссар, цифрардалгу бусласиссар, 50 шинал оьрму бакъа кьисмат къавхьусса АхIмад-Хан Султан лайкь хьуссар ХIукуматрал 22 ларайсса наградалун, вайннувух – кIива Мусил ЦIукун ва мукьра Лениннул Ордендалун. Гьунар бусса, аслансса лётчикнал душманнал 49 самолёт руртссар. Дяъвилия махъсса шиннардийгу реактивный самолетирттал хIал ххал бигьлай ивкIссар. 1961 шинал ванан дуллуссар СССР-данул лайкь хьусса лётчик-испытательнал цIа.
На буттал шяраваллил, Цалчинмур ЦIувкIуллал, агьлу барча бан ччай ура Виричунал юбилейращал.
Аьдатрайн бувну, ва кьини МахIачкъалаливсса Виричунал гьайкалдануцI тIутIив дишин батIинтIиссару жува.
ХIурматращал АхIмад-Хан Султаннул ссурахъил арс Сайдун ХIажикьурбанов
