Декабрьданул 8-нний ЦIуссалакрал райондалул администрациялул бакIчи МаматIи ХIамзатовлул каялувшиндаралу хьунни агьамсса масъалартту ххал бигьлагьисса совещание.
Шикку гьуртту хьун оьвкуну бия райондалул идарарттал каялувчитурайн ва шяраваллал бакIчитурайн.
БатIаврий хьхьичI ххуттайн лавсун бия шяраваллавусса ххуллурду бакьин баврил, налогру датIаврил, ЖКХ-лул даву низамрайн дутаврил, щинал дузалшиннарал, школардайсса ва садикирттайсса медкабинетру оборудованиялул дузал баврил, ссутилсса призыврал ва контрактрай къуллугъ баврил хIакъиравусса масъалартту.
Хьунни ихтилат ссуттилсса призыврал кампаниялия. Райондалул ссуттилсса призыврал план щаллуну биттур дурну дур. Ахирданий МаматIи ХIамзатовлул цIухху-бусу бунни совещаниялий кIицI къалавгсса райондалул щархъавусса агьамсса цаймигу масъаларттая.
Имара Саидова