«Дагестан» РИА-лий хьунни Дагъусттаннал Аьмсса хъуслил капитал ремонтрал фондрал хъунаманан кIанайсса Нажмуттин Ханбалаевлул пресс-конференция.
Байбихьулий ванал бувсунни ацIра шинал лажиндарай (2014-2024ш.ш.) чIяву квартирарду бусса къатраву аьмсса хъуслил капитал ремонт даврил региондалул программалул лагрулий Дагъусттаннай дурсса давурттая. Дунни ларгсса шинал хIасиллу.
КутIасса чIумуйсса пландалул лагрулий 2024 шинал аьмсса хъуслил капитал ремонт дурну дур чIявусса квартирартту бусса 137 къатлуву. Миннува МахIачкъалалив – 41, Каспийскалий – 14, Избербашлив – 25, Буйнакскалий – 8, Дарбантлив – 15, Дагестанские Огнилий – 4, Хасавюртлив – 4, Къизилюртлив – 9 , Къизлардай – 10, Южно-Сухокумскалий – 2, Бущихъиял райондалий – 1, Казбековуллал райондалий – 3, Дарбантуллал райондалий – 1 къатраву.
КIицI ларгсса къатрава 78 къатлуву дакьин дурну дур магъив, чIяву квартирартту бусса 13 къатлуву даххана дурну дур лифтру, 12 къатлуву бакьин бувну бур лажин чул, бакьин бувну бур 4 къатрал лувчIинниялу. Мукунна 56 къатлуву дакьин дурну дур вивсса инженер система.
2024 шинал КутIасса чIумуйсса пландалий ккаккан дурсса циняр давуртту щаллу дан бювхъуну бур. Мунийну къулай хьуну дур 16 409 инсаннал ялапаршиндарал шартIру.
Нажмуттин Ханбалаевлул кIицI лавгунни, 2025 шинал КутIасса чIумуйсса пландалий ккаккан бувну бушиву республикалул 12 муниципал сакиншиндарал 118 чIяву квартирартту бусса къатраву 250 конструкция гьануцIакул дакьин дан. Бувсунни ми давуртту 836, 81 миллион къурушран дацIантIишиву. КутIасса чIумуйсса пландалийн бувну, 2025 шинал дурсса капитал ремонтрал 17 201 инсаннал ялапаршиндарал шартIру ххуй дантIиссар.
Капитал ремонтрахсса взносирттал хIакъираву ванал бувсунни ларгсса шинал взносру датIаврил тагьар хьхьичIсса 2023 шиналнияр ххуй хьушиву (68, 13%), 2023 шинал – 56,58%.
Нажмуттин Ханбалаевлул бусласимунийн бувну, 2025 шиналсса КутIасса чIумуйсса план щаллу дуллалисса чIумал мивун ххи дантIиссар чIявусса квартирартту бусса 50-ннийн дирсса къатри.
Ихтилат къуртал хьуну махъ Нажмуттин Ханбалаевлул журналистътурал суаллахьхьун жавабру дуллунни.
Андриана Аьбдуллаева
