ЯхI-къириятрай оьрму бувтсса зунттал хъаннил чумартшиврия буслан мудангу тIааьнну бикIай. Ниттихъал кьинилуцIун бавхIуну, цила оьрчIнийсса оьрмулул чаннасса асарду, цуппа хъунма бувсса, ччаннай бацIан бувсса ниттицIун, ниттирссу Муигу дакIнин дутлай бур Аьрасатнал Виричу НурмахIаммад ХIажимахIаммадовлул нину Сапижат Мазаева.
Муи ва ванил лас, Оьмари Суллуев, Ккуллал шяраву чIярусса шиннардий киномеханикталну зий бивкIун бур. Куннайн кув дакI тIайласса, цаннал ца бувгьусса, ужагъраву дакьаву, гъилишиву ядуллалисса кулпат цинявннан эбратрансса бивкIун бур.
– Ниттирссу Муи гьарца чулуха авурсса, яла-яла дакI хъинсса хъамитайпа бикIайва. Инсантуращал бавкьусса, дакI аьчухсса, гъанманалгу, архманалгу чIарав бацIан хIадурсса бикIайва. Вайннал ужагърай хъамал бакъасса чIун дакIний дакъар. Къатлувун увкIсса хъамаличу дакI тIиртIуну кьамул айва. Хъинну нахIу-хIалимсса кулпат бикIайва, куннал куннахь цукунчIавсса кIусса жуав дурну дакIний бакъар. 2-6-ми классирттаву на дуклай бивкIссара Ккуллал шяравусса школалий. Нава вайнначIа ялапар хъанахъисса хIаллай хъихъи бивтун, ттунма ччимур буллай ябуллай бивкIссара. Цивппа аьрххилий лавгсса чIумал, мудан ттун ххуй-ххуйсса янна-ус, школалул кьай-кьуй, на ххари бансса бахшишру, нахIу-нацIурду ларсун бучIайва.
Ттул ниттирссу хъинну уздансса хъамитайпа бия. Ванин хъинну ххирасса бикIайва ласналми оьрчIругу. Оьмарил ца арс ва ца душ бия. Вайнналгу ниттирссийн «дадай» куну бакъа къаучайва. Оьмари дунияллия лавгун махъ, ниттирссу яхъанай буссия мунал арсначIа, РамазаннучIа. Махъва-махъсса гьантрайннингу Муи РамазаннучIа бивкIссар.
Хъярч-махсара ххирасса бикIайва. Ккуллал циняв хъаннил кунна, ниттирссилгу усттарну кIунулул даву дайва. Жун цинявннан жунна-жунна цIа куну жуларду, жикIитIру, гьухъри байва. Дазу-зума дакъа ххирая ниттирссин ттул арс НурмахIаммадгу. Ванангу ниттирссу хъинну ххирасса бикIайва. ХIасил, адав-инсап ялтту дурксса хъамитайпа бия, – буслай бур Сапижат.
Аьмал-хIал бавкьусса Муи бишин-битан кIану бакъа ххирасса бивкIун бур ласнал ляхъиндалунгу. ХIакьинусса кьинигу жямат бусраврай зумух ласлай бур уздансса хасиятру диркIсса, инсаншиву дурурччуну оьрму бувтсса Муил ва Оьмарил цIарду.
Имара Саидова
