Дагъусттаннай мукьва гьантлий най дия Дунияллул халкьуннал дянивсса
фольклорданул ва аслийсса культуралул ХХII «Горцы» фестиваль.
Фестиваль тIитIлатIисса иширацIун дархIусса гала-концерт хьуна М. Горькийл цIанийсса Оьруснал театрдануву.
Республикалул бакIчи Сергей Меликовлул ва цила цIания бавтIминнахь ча бувкру тIисса ихтилат бувна ДР-лул культуралул министр Зарема Буттаевал.
– «Горцы» фестиваль гьашину хъанай дур Кулпатрал шинал эгидалулу. «Горцы» фестиваль – му мудангу чIаку хъамалли, культурардал дянивсса диалогри.
Му мудангу цашивур ва бучIантIимунил цIанийсса захIматри, щихачIав къалавхьхьусса Дагъусттаннал халкьуннал культуралул атмосфералувун бюкьавур, цайми халкьуннал, жулва дустурал, хъамаллурал культуралущал кIул шавур. Му, гьай-гьайгу, журардал, жанрардал, рангирдал, халкьуннал искусство ккаккан даврил личIи-личIисса кьяйдардал аваданшивур. Вай цимурцагу – ва бунияласса лагрулул форумрал аьш-бакIри – увкуна ванил.
Аьрасатнал Федерациялул Федерал Мажлисрал Элмулул, кIулшиву дулаврил ва культуралул комитетрал председатель Лилия Гумеровал, Аьрасатнал Федерациялул культуралул министр Ольга Любимовал ва чIявусса цайминналгу цIардаясса барча баврил махъру бувккуна ва кьинигу сахIналия.
Фестивальданул гала-концертрай гьуртту хьуна Азирбижаннаясса, Индонезиянавасса, Белоруссиянавасса, УзбакIисттаннаясса, АьсатIиннавасса, Къазахъисттаннаясса, Къиргъизнавасса, Луганскаллал Халкьуннал Республикалиясса, Чувашиянавасса, Калининградуллал областьраясса, Пермь, Архангельск, Ульяновск шагьрурдаясса творчествалул коллективру. Мукунма жулла республикалул районнаясса ва шагьрурдаясса коллективругу.
«Горцы» фестивальданул лагрулийсса концертру хъанай дия жулла республикалул хъун шагьрулул личIи-личIисса майданнайгу.
Хъиривмур кьини республикалул районнай ва шагьрурдай хьунни культуралул ирсирал регионнал дянивсса «Буттахъал аьдатру» тIисса фестиваль. Ва сакин дурну дия Дагъусттан Республикалул Музыкантътурал союзрал.
Лакрал райондалий хьунни «Ккурккуллал Щаза» цIанилусса халкьуннал балайлул байран. Шикку гьуртту хьуна Къабардин-Балкьарнавасса «Нартхаса» цIанилусса вокалданул группа.
«Горцы» фестивальданий гьуртту хьун жулла республикалийн бувкIсса хъамал цалла-цалла культуралул программалущал республикалул муниципалитетирттайн лавгуна. Укунсса аьрххирдал лагрулий Дарбантлив Нарин-Къалалий хьуна «Балай уча, аьшукь!» тIисса байран.
МахIарамккантуллал райондалий хьуна «Шалбуздагъуллал макьанну ва балайрду» тIисса фестиваль.
Фестивальданул лагрулий хьусса выставкардавух кIицI лаганну МахIачкъалалив Сулайман Стальскийл бульварданий хьусса «Дагестан мастеровойгу».
«Горцы» фестиваль нанисса гьантрай республикалул хъуншагьрулий ва махъсса муниципалитетирттай чIярусса цаймигу шадлугъру хьунни.
Фестиваль дуллалиссар Дагъусттан Республикалул бакIчинал ва ХIукуматрал чIарав бацIаврийну Аьрасатнал Федерациялул Культуралул министерствалул, Аьрасатнал Халкьуннал творчествалул В.Д. Поленовлул цIанийсса къатлул ва Дагъусттан Республикалул Халкьуннал творчествалул къатлул. Фестиваль хъанахъиссар Аьрасатнал Федерациялул ЮНЕСКО-лул иширтталсса буллалисса комиссиялул эгидалулу ва «Культура» тIисса национал проектрал лагрулий.
Бадрижамал Аьлиева
