МахIачкъалаллал 54-мур школалий 11 Виричунал партарду тIитIлатIисса мероприятие хьунни Ватандалул Вирттаврал кьинилун хасну.
«Виричунал парта» «Единая Россия» партиялул программалул ца бутIар. Ва даврил гьанумур мурадгу Вирттаврал аьпа уттава баврицIун, ялун нанисса ник патриот зумуну тарбия давур. Ларгсса шинал вава школалий 35 цIа чирчусса партарду тIиртIуссар.
Мероприятиялий гьуртту хьунни республикалул парламентрал вакилталгу: КIулшиву дулаврил ва элмулул комитетрал председатель Елена Павлюченко, Законодательствалул комитетрал председатель Артур Исрапилов, Бюджетрал, финансирттал ва налогирттал комитетрал председатель Марат Илиясов, МахIачкъалаллал кIулшиву дулаврил управлениялул хъунмур Шаганэ Баймурзаева ва цаймигу бусравсса хъамал. Бия СВО-лий гьуртту хьумигу, вайннавух – Суворовлул медальданун лайкь хьусса МахIаммад МахIаммадов, ветерантурал организациярттал вакилтал.
«ОьрчIан гьарцагу Виричунал цIа кIулну дикIан аьркинссар. КIулну бикIан аьркинссар мунал оьрмулул ххуллия, чувшиврия. Проект так Вирттаврал биографияртту лахьхьин бувансса даву дакъар. ХIакьсса Вирттаврал оьрмурдая буслай, миннан ккавкмуния, чувшиврий кьини лахъаврия балжину буслай, дуклаки оьрчIал дакIурдиву билаятрахсса ччаврил ва пахрулул асарду цIакь буллалиссар. Вана хIакьину жущала ур СВО-лий гьуртту хьусса инсан, бур дяъвилул цIаравух бувксса ветерантал. Вайннал бусласимуних личIлулну вичIи дирхьуну бур оьрчIру. Укунми дарсирдал бияла личIиссар», – увкунни Артур Исрапиловлул.
– Гьарцагу парта – му так дакIний личIансса лишан дакъар. Чувшиврия, Ватандалухсса ччаврия ва мунил хьхьичIсса буржирая бюхханну бусласисса проектри. Тарбия дулаврил ххуллийсса давривугу ванил агьамшиву хъуннассар, – увкунни Елена Павлюченкол.
ОьрчIал Вирттаврал гьунардан хас дурсса литературалул ва музыкалул программа хIадур дурну дия, бюххансса балайрду увкунни, асар хьунну назмурду дурккунни. ЧIалай бия лавайсса даражалий даву тIайла дукканшиврул биялсса захIмат бивхьушиву, оьрчIру ххуйну хIадур хьуну бушиву. Бюххансса асар биянсса бия СВО-лул Аьрасатнал цалчинма Виричу НурмахIаммад ХIажимахIаммадовлул ниттил Сапижат Мазаевал ихтилатгу. Ванилгу кIицI лавгунни, Ватан дуручлай жанну ххира къадурсса чиваркIуннал оьрмурду хъирив нанисса никиран чувшиврул дарсруну хьун аьркиншиву, школалий мукунсса даврих къулагъас диялсса душиву ва хIура дуккан къаритантIишиву.
