Москавлив Дагъусттаннал БакIчи Сергей Меликов хьунаавкьунни АьФ-лул ХIукуматрал Председательнал хъиривчув Виктория Абрамченкощал.
Вайннал ххал бивгьунни республикалул шяраваллу ва цаймигу кIанттурду щинахьхьун лагаврия буруччаврин хасну исполнител властьрал федерал органнал бартдигьин аьркинсса давурттал хIакъиравусса масъалартту. Мукунма ххал бивгьунни Дагъусттаннал ухссавнил зоналий мелиоратив система лядуккан даврил масъала.
ЛичIину ххал бивгьунни Терек неххал дара марцI дуккан даврил масъалагу. Терек – му Ухссавнил Ккавкказнаву ца яла хъуннамур нех хъанай дур. Мунил зуманих нех къадукканшиврул бувну бур чарттал ва аьрщарал бакIурду.
Неххал даралуву тамансса гьагъ салкьи хьуну, нигьачIаву дур неххал чIарахсса кIанттурду щинахьхьун лагаврия. Мунийн бувну, хьунабакьаврий мукунма ххал бивгьунни Терек неххай щинал хозяйствалул комплексрацIунсса давуртту бартдигьин кумаг баврил масъалагу.
Яла ххал бивгьунни Аракумскаллал ва Нижняя Терскаллал чавахъру лувгъи байсса бярдугу, Аграханнул заливгу цIу буккан буван аьркиншиврул масъалагу. Ми масъалартту дузал буварча, тамансса кумаг хьунссия республикалул ухссавнил районнал социал-экономика лядуккан даврин. Виктория Абрамченко рязи хьунни Сергей Меликовлул пикрилущал.
Мунил бувсунни аьркинсса тапшурлугъру дантIишиву властьрал федерал органнайн.