Тталаткьини Дагъусттаннал кказит-журналлу итабакьай идаралул актовый залдануву хьунни Республикалул Информациялул ва печатьрал агентствалул коллегия. Шикку гьуртту хьунни ДР-лул БакIчинал ва ХIукуматрал администрациялул каялувчинал хъиривчув Рашид Акавов ва вице-премьер Заур Эминов.

Коллегия, тIигу-тIивтIуну, бачин бувну ия Агентствалул каялувчи Аьбдуразакь Жамалуттинов.
Байбихьулий Рашид Акавовлул бувсунни ларгсса шинал республикалий хьуну бивкIшиву информациялул пространствалий агьамсса кIану бугьансса чIявусса ишру.
– ХIакьину республикалул бакIчи Сергей Меликов уссар Москавлив ТАСС-рай пресс-конференция дуллай. Ва хъуннасса агьамшиву дусса ишираяту дайдихьлай дур гьашинусса информациялул шин.

Умуд бур ва иширан хас дурсса материаллу анализрал дузалсса дикIанссар, республикалул бакIчинал командалун лайкьсса кьимат бищунссар тIисса.
Иширах бургарча, дурну дур хъуннасса даву. Дан дакIнийссагу хъиннура чIярусса дур. ЧIал къавхьуну хьунтIиссар Минтрансрал пресс-конференция, Хасавюрт шагьрулул лагмасса ххуллул чару бишаврин хас дурсса. Ва хъуннасса агьамшиву дусса иш шинну ларгун махъ бусалану хьунтIиссар, цанчирча хIакьину жунма чIалай бур Хасавюрт шагьрулувух уккан къашайсса пробкартту бур (ихтилат «Кавказ» федерал трассалияссар), МахIачкъала шагьрулул Баргълагавал чулийнмансса. Ва ххуллий ахир дакъасса пробкалувун агьлай ур МахIачкъалалия Дарбантрайн ягу Сулакьрайн нанимагу. Шагьрулувун къабувххунма, лагмасса ххуллу байхту, куклу хьунтIиссар тагьар, – увкунни Рашид Акавовлул.

Аьбдуразакь Жамалуттиновлул бувсунни дагъусттаннал СМИ-лул тагьардания, дурунни шинал хIасиллу.
– 2023 шинал дурну къуртал хьуссар ведомствалийн дагьайсса идарарттал оптимизация. Гьарца нюжмардий буккайсса республикалул миллатрал 13 кказит цачIун бувссар «Этномедиахолдинг» тIисса паччахIлугърал бюджетный идаралувун.
«Дагестан» РИА-лий хIасул бувссар ттизаманнул журалий бувсса пресс-конференцияртту дуллансса площадка. Укунмасса площадкартту буллай буссар цайми СМИ-рдай ва «Дагестан» этномедиахолдинграй, «Дагестан» луттирду итабакьай идаралий.
Агентствалул агьаммур мурад хъанахъиссар ниттил мазру буруччаву. АцIния шанма мазрай буклакисса кказит-журналлу, теле-радиопередачартту дакъасса, ларгсса шинал дунияллийн бувкссар дагъусттаннал мазурдийсса 51 жуж, – увкуна ванал.

Аьбдуразакь Жамалуттиновлул бувсуна Расул ХIамзатов дунияллийн увккун 100 шинан хасну оьрус мазрай ва яру мазрай итабавкьуну бушиву 10 том.
Му бакъассагу, итабавкьуну бур шаэрнал произведениярттал 7 сборник, вайннувухва бур оьрус мазрайсса текстращал ингилис мазрай итабавкьуссагу, кIива фотоальбомгу. Юбилейран хас бувну «Дагъусттан» журнал итабавкьуну бур оьрус мазрай ва яру мазрай, эфирданийн дурккун дур документал фильмругу.
Информациялул ва печатьрал агентствалул хъунаманал цалчинмур хъиривмур Наида МахIаммадовал бувсуна махъсса чIумал хъун хьуну душиву буккултрал аьдад паччахIлугърал СМИ-рдал телеграм-каналлах.
Информациялул ва печатьрал агентствалул каялувчинал хъиривчув Аслудин МахIаммадовлул бувсуна ларгсса шинал дагъусттаннал кказит-журналлу итабакьай идаралул актовый зал ремонт бан харж дурну душиву 7 млн къуруширттал.
Мудан буккайсса печатьран харж дурну дур 265 млн къуруширттал. Кказит-журналлу итабакьай идарарттал зузалтрал захIматрал хIакьлин харж дурну дур 220 млн къуруширттал, типографиялул харжлугъран — 35 млн къуруширттал.
«Дагестан» РГВК-лул даврин харж дурну дур 121 млн къуруширттал, зузалтрал харжирдан — 62 млн къуруширттал.
«Дагестан» луттирду итабакьай идаралул даврин харж дурну дур 92 млн къуруширттал. Расул ХIамзатовлул 100 шинал юбилейран хас бувсса луттирду итабакьин миннува харж дурну дур 39 млн къуруширттал.
Этномедиахолдинграл каялувчи Арсен Юсуповлул бувсуна холдингравун цачIун бувния махъ миллатирттал СМИ-лул давриву хьусса дахханашивурттая.  КIицI лавгуна журналистътурал цала чирчусса материаллансса гонорар лахъ дурну душиву, мунийн бувну лавай хьуну бушиву миллатирттал СМИ-рдал контентрал даража.
Коллегиялий ихтилатру бувна «Дагестан» РГВК-лул директор Камила ХIамзатовал ва  «Дагестан» журналданул хъунама редактор Марат ХIажиевлул.
Марат ХIажиевлул бувсуна Расул ХIамзатов дунияллийн увккун 100 шинан хасну итабавкьусса журналданул хъирив хIадур буллай байбивхьуну бушиву Сулайман Стальский дунияллийн увккун 155 шинан хас бувсса журналгу. Бувсуна «Тарки-Тау» тIисса луттирдал фестивальдания, мунил сий шиная шинайн лахъ хъанай душивугу кIицI лавгун.
«Дагестан» луттирду итабакьай къатлул директор УмархIусман ХIажиевлул бувсуна цала каялувшиндаралусса идаралул 2021 шиная шийннай ххюлийну гьарза хьуну душиву ваниннийн итабакьлай бивкIсса луттирдал аьдад.
Ванал кIицI лавгуна цува хъанай ушиву миллатирттайсса мазурдий луттирду итабакьаврил чул бувгьума.
Коллегия къуртал хьуна Дагинформагентствалул журналистътуран ва зузалтран Барчаллагьрал чагъарду ва ХIурматрал грамотартту дулаврийну. Вайннавух бур «Аьрщи ва агьлу» передачалул автор Карина Далиевагу.

Зулайхат Тахакьаева