Итникьини Гъумук кIицI ларгунни Буттал улклул Вирттаврал кьини.

Райондалул аьралий комиссар Аьли ГъазимахIаммадовлущал ва идарарттал каялувчитуращал архIал райондалул бакIчи Зураб Куччаевлул тIутIал шалкри бивхьунни Буттал кIанттул цIанийсса Хъун дяъвилия зана къавхьуминнан дацIан дурсса гьайкалдануцI.

– ХIакьину жува бакIру кьус ритлай буру ватандалул ххуллий жанну дуллуминнал чаннасса аьпа­лул хьхьичI. Буттал КIанттул цIанийсса Хъун дяъвилия зана къавхьуминнал виричушиву абадлий мусил хIарпирдах чирчуну дуссар тарихраву. Тайннал чувшиву эбратну дуссар хъирив наниминнан. Жува пахрулий буслай буру жула заманнул вирттаврая – хасъсса аьралий операциялий жанну кьурван дурминная ва хIакьинугу тикку паччахIлугърал мурадру буруччаврил ххуллий талатиминная. Жард къакуну талай, къириятрай ларсун най буссар тай жула ппухълуннал цIанихсса аьдатру, – увкунни Зураб Куччаевлул.
– Вирттаврал кьини – ва укуннасса календарьданий­сса дата дакъар. Ва Ватандалул кьуват цала арсваврал дакI тIайлашивруву ва чувшивруву бушиву цумацаннангу бувчIлачIисса кьинир. Жула бурж – ватандалул ххуллий жанну дуллуминнал аьпа буруччавур, хIакьину ватандалул хьхьичIсса мурадру буручлачиминнах аякьа давур, – увкунни аьралий комиссарнал.
«Память Гор» организациялул Лакрал райондалийсса отделениялул хъунама, СВО-лул гьурттучи Юнус Эфендиевлул бавтIцири барча бунни хасъсса аьралий операциялий талатиминнал цIания.
Гъумучиял школалул дуклаки оьрчIал дурккунни вирттавран хас дурсса назмурду.

Зулайхат Тахакьаева