Январьданул 30-нний Лакрал театрданул сценалий хьунтIиссар Казбек Мазаевлул «Ххурттама» тIисса кьисса гьанулун лавсъсса «Гули» тIисса спектакльданул премьера.

Режиссер-постановщик – Аьрасатнал лайкь хьусса артист Аслан МахIаммадов.
Сценарий чивчуну бур Дагъусттаннал филологиялул элмурдал кандидат Ххазина Аминовал.
ХIасратсса кьадарданущал дунияллийн бувксса жагьилсса хъамитайпа цила пикрирдая ва асардая буслай бур балайрдайну. Ванил шеърирдаву, дагьанттуву кунма, чIалай бур XIX-мур ттуршукулул замана.

Та заманнул хъамитайпалул ххаришиврия, кьурчIишиврия, ччаврия, дакI тIайлашиврия, чумартшиврия ва дакIнил кьуватраясса спектакльдануву бивхьусса агьаммур пикри бур хъамитайпалул къирият хIурматрай ккаккаву, жяматраву архIал бацIан баву, талихIрайн ихтияр душиву.
НукIузамана ккаккан бувну бур музыкалийхчил – лакрал халкьуннал поэзиялул ттиркьюкьину хьусса балайрду ишла баврийну, кулпатрал багьу-бизулиясса аьдатру ккаккан даврийну.

Зулайхат Тахакьаева