Хъаннил байрандалул гьантрай ДР-лул Халкьуннал Мажлисрал председательнал хъиривчув, Региондалийсса «Справедливая Россия – Патриоты – За Правду» партиялул отделениялул каялувчи Камил Давдиевлул барча бунни ветеран-педагог, хIакин ва цалва учительница АхIмадова Гугьар Билаловна.

Гугьар Билаловнал 45-хъул шинну дурну дур Ккуллал райондалийсса Хъусращиял дянивмур даражалул школалий учительну зий. Гугьар шяраваллил жяматрангу, цищала зузиминнангу бусравсса, дуклаки оьрчIан дакIнийхтуну ххирасса учительница бикIайва. ХIакьинусса кьинигу Хъусращиял школалий дуклай бивкIсса оьрчIан Гугьар Билаловна цала нину кунма ххирану бур.
Бувну бур Гугьар декабрь зурул 20-нний 1937-ку шинал. 1963-ку шинал Дагъусттаннал паччахIлугърал медициналул институтгу хьхьичIунсса хIасиллай къуртал бувну, зий бивкIун бур Хъусрахь хIакинну. Цаппара шинну дурну дур Гугьардул цIанихсса аьлимчув, машгьурсса хирург Наби ЦIаххаевлул каялувшиндаралу Госпитальный хирургиялул кафедралий хъунмур лаборантну зий.
1974-ку шинал къуртал бувну бур ванил ДГПУ-рал биологиялул факультет. КIилчинмур пишалул кIулшивугу ларсун, зун бивкIун бур Хъусращиял школалий биологиялул дарсирдал учительну.
ЗахIматрал ххуллий лайкь дурну дур «ДР-лул аьмсса кIулшивуртту дулаврил хIурмат бусса зузала» тIисса бусравсса цIа, хьуну бур захIматрал ветеран.
Шяраваллил кIанттай учительну зузисса ппурттуву Гугьардун чIявуну инсантуран медициналул кумаг буллан багьайсса бивкIссар. Ванил, медициналул кумаг баву бакъассагу, маслихIат бувну, тIааьнмур бувсун, инсантал рахIат буккан байсса, ляличIину иминсса хасият дикIайва. Шяравусса инсантуран хIакин аьркин хьусса ппур­ттуву – дяхттагу, хьхьувайгу, ле­ххаврий ваничIан бучIайва.
Ванин кIула дуклаки оьр­чIащал маз лякъин. Гугьар Билаловна бия Занналва ляхъан був­сса педагог ва хIакин. Хъусращиял шяраву ва ххишала бакъа бусравсса, чIявусса захIмат бивхьусса, эбратрай оьрчIру хъуни бувсса инсан бур.