![](http://ilchi.beget.tech/wp-content/uploads/2019/09/IMG_6623.jpg)
[dropcap]Л[/dropcap]аргсса нюжмардул ахирданий Амучи Амуттиновлул каялувшиндарай Лакрал Национал советрай хьунни ирглийсса батIаву, цувгу хас дурсса октябрьданул 19-нний дуван дакIнийсса лакку мазрайсса тотальный диктантрайнсса хIадуршиндаран.
Бадрижамал Аьлиева
[dropcap]М[/dropcap]уний гьуртту хьунни, профессор, тарихрал элмурдал доктор АхIмад Кьурбанов, ДГУ-лул Дагъусттаннал халкьуннал литературалул кафедралул доцент Ххазина Аминова, Лакрал радиолул хъунмур редактор Тамара Закарияева, МахIачкъала шагьрулул 16-мур школалул лакку мазрал учитель ПатIимат Аьлиева, Лакрал жагьилтурал обществалул председатель Давуд Амиров, Вихьуллал жагьилтурал вакил АьвдурахIман Гуйдалаев, Бархъаллал жагьилтурал вакил Рустам Кьурбанов, Ккуллал жагьилтурал вакил Марина ХIусайнова.
Дагъусттаннал миллатирттал мазурдийсса диктантирттал сиптачи бур «Аьрасат – ттул тарих» тIисса Тарихийсса парк, сакиншиндаралсса буллай бур Лакрал Национал совет ва Лакрал жагьилтурал общество. Уттинин укуннасса диктантру дурссар яруссаннал ва табасараннал мазурдий.
Диктантрай бикIантIий бур 150-160 махъ, текстгу бикIан аьркинссар тарихийсса темалийн ягу ватандалухсса ччаврийн багьайсса.
Диктант чичин ккаккан дурну дур 30 минутIрай. Мунивух гьуртту хьун бюхълай бур ччима инсаннаща, ци оьрмулул шиннал, ци къуллугърал, касму-сянатрал заллу унугу. Лакку мазрайсса диктантравух гьуртту хьунтIиссар 300-нния ливчусса инсантал: лахъсса къуллугъчитурая тIайла хьуну, пенсионертурайн, укунмасса инсантурайн бияннин.
Ва кьини хьусса батIаврий ххал бигьлай бия сакиншиндарайн багьайсса цаппарасса масъалартту.
Лакрал Национал советрал члентурал бувсунни лакку мазрайсса тотальный диктантрал хьунийнсса ваниннин махъра-махъмур хьунабакьаврия шиннай цалла дурсса давурттая.
Диктант хьунтIиссар октябрьданул 19-нний МахIачкъалалив – Тарихийсса паркраву.
Щак бакъа, ва хIакьинусса кьини хъинну аьркинсса давур Тарихийсса паркрал ва Лакрал Национал советрал дуллалисса, ванил буттал улклухсса ччаву цIакь давриву, ниттил маз лахьхьаврихсса гъира гьаз бавриву цин лавхьхьусса кIану бугьантIиссар.
ХIурмат бусса буккулт! Агарда зувува хIасул хьурча ва даврицIун бавхIусса личIи-личIисса пикрирду, сиптарду, миннухгу гъирарай вичIи дишинну. Чичара, оьвчара редакциялийн, ягу Инстаграмравусса кказитрал ягу Лакрал жагьилтурал суккушиндарал лажинтирттайн.