Апрель зурул 14-нний оьрмулул 70 шин бартлаглай дур ххаллилсса пишакар ва инсаншиврул бутIа буллусса хъамитайпа, ОьмархIажинал душ ХIажиева ХIабибатлун.
ХIабибат бур цила оьрму инсантурал цIуллу-сагъшиву дуруччаврин хас бувсса зузала.

1967 шинал Дагъусттаннал медициналул училищалул фельдшертал шайсса отделениягу къуртал бувну, ва бувкIун бур зун Ккуллал райондалийн, СумбатIуллал шяравусса фельдшерско-акушерский пунктрал хъунмурну. Шикку зий 6 шин дурну дур ХIабибатлул. Таний ванил каялувшиву дуллалисса ФАП райондалий яла хьхьичIунмур бивкIун бур. Ххуй­сса пишакар ва каялувчи хIисаврай, ХIабибат цуппагу цимилагу лайкь хьуну бур шяраваллил ва райондалул администрациярттал чулуха­сса грамотарттан. Ванин дуллуну дур орден «За доблестный труд».
1973 шинал МахIачкъалалив бувкIун, 3 шинай зий бивкIун бур оьрчIал поликлиникалий участокрал медсестрану. 1976 шиная шихунмай ХIабибат зий бур МахIачкъала шагьрулул 1-мур роддомрай, 1998 шиная байбивхьуну, миккува вилттили оьрчIал отделениялул хъунмур медсестрану. Гьашину 50 шин хъанай дур ХIабибат медициналул идарарттай зий. Ва бур захIматрал ветеран. ХIабибатлул бур шанма оьрчI, микссава оьрчIал оьрчIру. Ва бур ххаллилсса нину ва аякьа дусса бава.
ХIабибат хIурматрай бур цу­ппа зузисса коллективраву.
Оьрмулул юбилей барча дуллай, чIа тIий буру ХIабибатлун цIуллушиву, гьарица дуллалимуниву тIайлабацIу. ОьрчIалгу, оьрчIал оьрчIалгу ххари буллай, оьрмулия щалихханнин битаннав, вил дакIнийсса цинявппа хияллу бартлаганнав.
Вил хIурмат бусса 1-мур роддомрал оьрчIал
отделениялул коллектив