Ларгсса нюжмар кьини байран хьунни Гъумук. Гьашину хъарас щунсса кьуру бия райондалул депутатътурал мажлисрал хъунама, райондалул агьали социал зумуну дузал баврил центрданул директор Шяпи Щурпаевлуй.
Зулайхат Тахакьаева
Буттал буттахъачIа яла кьимат бюхттулну диркIсса, кьянатсса зунттал аьрщарал буллугъшиврул ва барачатрал лишанну хьусса ва никирая никирайн ирсирай нанисса Хъарас щаврил аьдат дур хIакьинусса кьини диялну чан хьусса хьхьичIазаманнул аьдатирттавасса ца. Бусравну дур му шагьрурдай минарду думинначIагу.
Шинай кIира кьини дур хIатта бувагу кIива-шанма къатта ливчIсса щархъурдугума уттара дуккайсса, шярава лавгминнан буттал кIану хъамабитан къабитлатисса, ца – Зумаритавал байран, цагу – Хъурдаккаврил кьини.
Гъумукун Хъарас щаврил байрандалул мажлисрайн бувкIун бия ДР-лул Халкьуннал Мажлисрал депутат ЖахIпар Абуев, «ЯР» ООО-лул хъунама директор Вали Магатаев (Москав), медициналул элмурдал доктор, профессор Илдар Минкаилов, Аьрасатнал пенсион фондрал МахIачкъала шагьрулул Кировуллал райондалул управлениялул каялувчи МахIаммад Оьмаров, ДР-лул Жяматийсса Палаталул хъунаманал хъиривчу Ссапар Аьбдуллаев, ишбажаранчитал Аьбдулхаликь Халикьов, Сайпуллагь Аьбдуллаев.
Аьрасатнал личIи-личIисса шагьрурдая бувкIун бия Шяпинал гъан-маччами ва дус-ихтивартал.
Цинявппагу хъамал бувккун бия Хан-Муртазааьлил гьайкалданул ттиликIрахсса къурув. Гикку хъарас щаврил эбадатран Хъузалал гъайувкуна хъун бакъасса хъунил парча. Ванал гъайувкусса дазурдавух гьаннагу бишлай, дуаьртту дурккуна 45 шинал лажиндарай Гъумучиял колхозрай зий, райондалул шяраваллил хозяйство хьхьичIуннай даврил ххуллий хъунмасса захIмат бивхьусса бусравсса ризкьичи МахIаммадрахIин Абакаровлул.
Уртту-тIутIи дюхъаннав,
Баргъ-гъарагъи дакьиннав,
Ттархь дургьунал
тта бюхъаннав,
КIамайму бувгьунал
хъу дюхъаннав!
Шяпиуксса сун хьуннав!
Хъунасса Заннал
цIими бишиннав!
Муния махъ, райондалул байрандалийн бавтIцири хIала бувххун, Хан-Муртазааьлил гьайкалданул лагма-ялтту бувгьуна мурхьру. Гикку бугьансса мурхьру лавсун бия Шяпи Щурпаевлул цала харжлугърах.
Райондалул бакIчи Юсуп МахIаммадовлул кIицI лавгуна ларгсса шинал цащава кьуру лавсния шихунайва айивхьуну ивкIшиву Шяпи ва байрандалийн унгу-унгуну хIадур хъанай. Магъи даххана дурну, щяхсса плитарду даркьуну, цIубуккан бувну бур цала ттаттал Нажмуттиннул 1982 шиналва бувсса Гъумучиял бярничIасса ккурчIа (беседка). Гъумучиял агьулданун пишкаш дурну дур Хъун бярувх бигьлансса лодка. Хъарас щаврил байрандалул хьунийнгу Шяпинал ЦСОН-далул ва администрациялул зузалтращал хъуннасса субботник дурну дия Хан-Муртазааьлил гьайкалданул лагма-ялттусса кIанттурдай.
Байрандалий ялагу махъру лавхъуна ЖахIпар Абуевлул, Вали Магатаевлул, Ссапар Аьбдуллаевлул, АьвдурахIин Дибировлул.
Райондалул магьирлугърал къатлул зузалтрал ва Гъумучиял магьирлугърал школалул оьрчIал ккаккан дуруна ххаллилсса концерт.
Муния махъ РАЙПО-рал столовойлуву тIивтIуна хъарас щаврил ссупра. Мунил тямадашиву дуллай ия Аслан Къажлаев. Ванал бувсуна Шяпинал ниттил ппу КъитIачаев Султанбилал дяъвилул шиннардий Гъумучиял колхозрал председательну зий ивкIшиву. Колхозрал буллалисса кумаг бакъасса, ванал цала ужагъраягу дяъвилун кумагран тIайла дурккун диркIун дур чIярусса арцу-муси, Сталиннул цала каруннища ларсун диркIун дур ванал ЗахIматрал ЯтIул Ттугълил орден. Султанбилал аьпалухьхьун лавгсса 1952 шиная 1982 шинайннин колхозрал председательну зий ивкIун ур Шяпинал буттал ппу Нажмуттин Щурпаев.
Ванал каялувшиндаралу Гъумучиял колхоз хьуну дур колхоз-миллионер. Ппу ХIажиаттагу бусса оьрмулий колхозраву зий ивкIун ур механизаторну. ХьхьичIунсса механизатор хIисаврай, ва ккаккан увну ивкIун ур СССР-данул Социалист захIматрал Виричунал цIанин. Шяпигу, цала ппухълуннаха лавхьхьуну, буттал кIану ххирасса, буттал кIану хьхьичIунмай бансса давуртту дуллай ушиву кIицI лаглай, ванал савлугърая кьуртти гьаз буллай бия хъамал.
ЯлунчIил хъарас щун кьуру лавсунни райондалул Гъумучиял шяраваллил администрациялул бакIчи МахIаммад ХIусниевлул.
