![](https://ilchi.info/wp-content/uploads/2019/12/12-1-150x150.jpg)
[dropcap]Д[/dropcap]екабрьданул 25-нний Журналистурал союзрал къатраву хьунни аьдатравун багьсса, хьхьичIунсса журналистуран наградартту дуллалисса шадлугърал мажлис.
А. Аьбдуллаева
[dropcap]М[/dropcap]ажлис тIитIлай, ихтилат бунни Дагъусттаннал Журналистурал союзрал председатель, Аьрасатнал Журналистурал союзрал секретарь Аьли Камаловлул.
— ХьхьичIунсса, лайкьсса журналистал лахъа-хъун буллалисса «Мусил барзу» конкурсрал хIасиллул дуллалисса мажлисру буллай жула 20 шин хъанай дур гьашину. Ва мутталий чIявусса Дагъусттаннал журналистурал лайкь дунни личIи-личIисса Аьрасатнал ва республикалул наградартту. Му мутталий жула дянива лавгунни гьунар бусса, байлсса мукъуйну тIайламунил цIаний талай бивкIсса журналистал. Ми дакIний битан ва миннал дуллай бивкIмур гихуннайгу дачин дан жула буржри, — увкунни Аьли Камаловлул.
Ванал бувсунни Дагъусттаннал Журналистурал союзрал гьану бивзшиву 1959-ку шинал март зурул 4-нний, гьашину 60 шин хъанахъисса юбилейрацIун бавхIуну итабавкьушиву вай шиннардий дурмунил хIасиллу дуллалисса лу.
Ихтилат къуртал хьуну махъ журналистуран дуллунни личIи-личIисса наградартту.
Наградартту лайкь дурминнавух бия «Илчи» кказитрал зузалтгу. ХIурматрал лишан «Честь, достоинство, профессионализм» тIисса медаль дуллунни Качар ХIусайнаеван, «Мусил барзу» конкурсрал диплом – Андриана Аьбдуллаеван, Журналистурал союзрал чулухасса грамота — Амин Аьбдуллаевлун.
Барча дуллай буру жула зузалтрахь, журналистурал дянив сий дусса наградартту.