Август зурул 22-27-нний Къазаннай хьунтIисса дунияллул халкьуннал даражалийсса Worldskills захIматрал пишардал чемпионатрай гьуртту хьунтIиссар ДР-лул ХIукуматрал председатель Артем Здунов бакIчисса делегациягу.
Мукунма чемпионатрай гьуртту хьунтIиссар «ТIайлабацIу» тIисса жагьилтал давурттал дузал байсса центрданул директор Шамил МахIаммадов, республикалул министерствардал вакилтал ва пишарду лахьхьин байсса идарарттал каялувчитал.
Дунияллул даражалул чемпионатрай гьуртту шаврийну Дагъусттаннаясса делегациялун ххишаласса сант хъанахъиссар региондалий Worldskills суккушинна хьхьичIуннай даврин.
ДакIнийн бутанну, Къазаннай хъанахъисса чемпионатрай гьуртту хъанахъишиву щалагу билаятраясса 1000-хъул пишакартал. Бяст-ччаллу най бикIантIиссар 56 журалул магьиршиву ккаккан давриву.
ПатIмат Шихшаева