ХIакьину, ноябрьданул 4-нний, Халкьуннал цашиврул кьини, МахIачкъалалив хьунтIиссар байрандалул шадлугъру, цIанасса тагьар хIисавравун ларсун, Роспотребнадзорданул тIалавшиннардугу биттур дурну.

Дагъусттан Республикалул Культуралул министерствалул ва Республикалул Халкьуннал творчествалул къатлул сакиншиннарайну, Къумукьнал театрдануву хьунтIиссар халкьуннал творчествалул Республикалул байран «Вместе – мы Россия!» ва халкьуннал усттартурал Республикалул выставка-ярмукIа «Дагестан мастеровой».
Ва кьини Къумукьнал театрданул сахIналийн буккантIиссар паччахIлугъ­ралми коллективру ва республикалул муниципалитетирттаясса творчествалул коллективру ва таксса балайчитал, вайннувух – Лакрал, Ккуллал ва ЦIуссалакрал районнаяссагу.
Халкьуннал усттартурал дурмунил ккаккия хьунтIиссар театрданул фойераву. Тамашалун дирхьуну дикIантIиссар бархъаллал, испикуллал ва сулавккантуллал тIахIунтту, оьргърал усттартурал каруннил дурмур, бежтIиял усру, халкьуннал музыкалул инструментру ва чIярусса цаймигу затру.
Шадлугърал гьарцагу гьурттучинан булунтIиссар диплом.
Байран ккаккан дуллантIиссар «Да­гъусттан» ГТРК-лий, «Дагъусттан» РГВК-лий ва Республикалул Халкьуннал творчествалул къатлул интернетравусса лажинтирттай.
Байран дайдихьлахьиссар ссят 11.00 хьуну.