Бавалгу буллай бура, Бура буллай бутталгу, Навара къахъанайсса Къалай къадурк варакъун.

Уссилгу буллай бура, Ссувагу рязину бур, Навара къахъанайсса Сир къабувк тIаннул къусун.

* * * Маялугьларду, яруй, Ярагъ чаннаннал хъирив, ДакIний чаннан дунугу, Ттул чурххай хIал бакъари.

Мадачара, дикIул дакI, Дучри кутакнал хъирив, Кутак канихь дунугу, КIиллувун къаласара.

* * * На вин ччарча, ттул дарман, БакIраяту багъ банна, Багъирал лухIитIутIи Букан кIулну ухьурча.

* * * Къуртламалул къурхъ-явав, Душманнал дуаьявав, Ваксса жува ччай буна, Нясив къабувну ливчIсса.

* * * Бувгьуну ххявххунавав, ЧIапIив ттиркьюкьал шиву, Щин дирхьуну хьунавав Щинал зиян мусил мурхь.

* * * Ттул дакIнил буттукьирал КIула вихьра духьурча, Инава ацIан кIанттай Нагу дакIнийн булути.

* * * Аслу-наслу ххал буллай, Ас-кьини яла дугьлай, Була кунан къабуллай, Ххуй душ, вил оьрму зия.

* * * ЦIан ттурлу хьхьичI дунура, Ххяххабургъил сил ласай, Инава тIий бунува, Вища на ласун къашай.

* * * РатIру дурцIу ттуруллив, Баргъ бивтун, бургъил ласай, Ттул дакI дурцIу буруккин Щил яла ласунавав?

* * * Щюлли урттухь дакI дачIин, ТIутIахь буруккин бачIин, Эшкьилул диван буван Гьанна бюхттул барзунттайн.

* * * Ца зума зунттуй дури Ттул якьутирал бургъил, Зума майданнив дури Ша мусил ссурулккуртлул.

* * * Баргъ, ина ссавнийх занай, БагьтIатIвагу къашарав, Ччаврил ламаран лахълай, Ччувагу-къаччуччарав?

* * * Арцул хъазам ппив бувну, ХIала дирчу дикIул дакI БатIулния къаданна, Ахирзаман бивзнугу.

* * * Бюхттул зунттугу ттулли, МикIлачIайсса, бассайсса, Аргу ттул ласакинни, Щюлли шайсса, кьакьайсса.

* * * Булбулданул дялахъру ТIутIащалли дикIайсса, Булбул, на вин ссайгъатран ТIутIал къюмай гьан данна.

* * * Ссаламрал чагъар хьуннав, Ттул вийн зиярат хьуннав, Жува кувннан кув ккаккан Заннал нясив буваннав.

* * * Бюхттулний къатта банна, Гьаваллав гьану бивзун, Ттиркьюкьал гьаржа банна, Гьалмагъайл эшкьи дишин.

* * * Эшкьилул тIутIал ардайн Заннал рахIмат буварчан, Лухччинул ци кьудратри ТIутIив ххяххан къаритан.

* * * Я на цIаллил бакъара, Я цIуцIаврил бакъара, Ххуй оьрчI, ина сававрай, Таллагь, бивчIавай бура.

* * * На чIа тIисса Заннахьра Гьарцаннан булай мурад, Къабулурча, вил ва ттул Дичача ялун аьрщи.

* * * Вийн ссалам, ссурулккурттай, Сирмагьилул чурххирайн, Ссалам, туйгъун лелуххий, Ина усса шагьрулийн.

* * * АьтIутIи, тIутIул яруй, Хъювхъу уча дикIул дакI, Дарамшалул ария Къиргъу бивзун лавгунни.

* * * Гьуя уча, ттул бавай, БакIухуннай дурургун, КIунттил дургьу ччергъилу Мурчал ларсунни куну.

* * * Гьарай уча, дакIнил дус, ШагьраххуллуцI авцIуну, КIюла магьилул хIави Гъагъан мабари куну.

* * * Щюлли хьхьирийн ххяххавав, Къуйсулийн кIутIу хьував, Ца ина сававирай, Щар кьадиртун, вай гьавав.

* * * Бюхттул зунттая дирзун, Шагьрурдайх ппив шай ттурлуй, Ттул ссаламгу ласикьай Та Москавлийн бияннин.

* * * Ттул ца хиял буссия Шушлува шараб хIачIан, Шиши багьан бувунна, Оьрус пириказ бувккун.

* * * Кьунну, бавай, ттун макIра Урттив цуппалу къатта, Ялагу къатлул чIарав – ТIаннуяту бувсса чу.

* * * Щюлли хьхьирил чIанулу Хас маржандалул хIавий, Ттул арцул чIиллух бакъа, Кьукьин нясив къабаннав.

* * * Щюлли хьхьирийх нанисса, Ттул эшкьилул пароход, Ттул гьалмагъай нанийкун, Хъинну хъюлчай мачара.

Наниссарув, уссурвал, Наси, ххуллухъин баннав, Тти лавгссарув, ссурахъал, На хъама мабитару.

* * * На бавал бувсса чIумал, Дардру циняв къакIула, Тти, дардру чIяру хьуну, Чурххал хIал ласлай бури.

* * * Мисри хъуслил ттучаннай Багьлул ларайсса алмас, Ласун каши дакъанна, Муштари циван увкра.

* * * Интту ттуруллащал ДакI тIайла данна, ЧчатI бакъа аьрщарай, Вин ккашин дукан.

* * * Мийра ттуруллащал Яру гьан банна, Щин дакъа авлахърай, Вин мякьлин хIачIан.

* * * АьтIийнма бикIара Муххал магъулу, Махмурданул гьухъуйн Аьтартту бутIлай.

* * * КIяла чагъар, лухIи хха Ссаламрай тIайла банна, Эшкьилул азархана Яла къалавгсса кIул бан.

* * * Яру-яруй, яхI бара, Ккавкцириннуйн щукрулий, Цикссагу ккаккайссарча Ччиссагу, къаччиссагу.

* * * Амангъар, гьуру-кIуруй, Амангъар, муччуччул къав, Бархъаравппай бачиннин Му къачулий мачI диза.

* * * Бургъилух гъили къачуй, Гъаралух варсул усруй, БурчIилух цIуши бакъуй, ЧIиралух вардиш дакъуй.

* * * ЧIелмултравух ши буки, ХъатIравух хъагу буки, Сарабугъдайн хьулданий, ЛикъачIан ккашилнува.

* * * Ччаврил марч бишлан бикIай, Ссавур чан хъанан дикIай, Бунил бавссуну бачай Ттул кIюла магьилул чурх.

* * * Къаччайнува лакьинна Ччаврил къабувччу яру, Ччайнура кьаританна ЯтIул мусил дуниял.

* * * ЧIа кунан мурад булай Къубахалдил щаращи, Ттунния къабуллунни, Гъинттул бургъил кьакьувча.

* * * Ина ва на щябикIай Щюлли кувссал зуманив Ялун гъи дайдишиннин Уртту къакьакьавивав…

* * * Щюлли урттуй мусил хьхьем Бургъил къиялул кьакьай, Вих аьтIисса ттул яру Ссал къиялул кьакьави.

* * * Ттул гьалмагъайл гьалмахщар – Ахъуву хъахъи къавахъ. Гьалмагъайн буцай ххуй душ – Гьанав ххярхсса ччиккул ус.

* * * Бизанттуй курчIри бацIай, Хьхьуцанттуй чахъри бацIай, Ца вих хьусса ттул ччаву ВичIа дакъа къадацIай.

* * * Илхъилуву хъахъи чу Хъирив эр-эртIи бувну, Газулий лухIи ахтлуйн Хьхьури ци тIий лаххави.

* * * Ва дунияллул чаннайн Ттул чурхгу къабувккунни, Зунттаву аврдал дайсса Минагу хьун дурари.

* * * НукIу ина ттун кIулъяв Аьлимнан элмунияр. Тти хъамаивтун ура Чапурнан чакнияргу.

* * * Мадиналий чак банна, Маккалий дуаь данна, Кяъвалул чIирахату Заннахь ина чIа чинна.

* * * БакIщаращину хьурдай БакIраву тIутIул яру, Щаращул щинни куну, Дуснахьхьун хIачIан булун.

* * * На вичIан бучIавияв, ВичIа чIутIул кьун бури, ДакIнийсса бусавияв, Лагма ттуруллив дури.

* * * Ттуруллал някIшиврувух Лелуххантрал гьава бай, Нагу гьава бавияв, Хъаттирдай щинзир дури.

* * * Ца хъаралух на бугьи, Ца хъарай мажар биша. Ца ялгъузсса бурцIилли Яттил ттурзан лияйсса.

* * * Чулу дикIуй цIу дихьлай, ЦIудикIуй кIункIур бизлай, Цинма ччикун ябанну Айгъур ляхъиндалул душ.

* * * Яттугу арив бакъа, Ттархьгу бизанттуйн рути, ЧIуннича, шавай нану, Ттул багьа бакъа къазахъ.

* * * Буруккин бури дакIний Шириндалул ккуккуксса, Пуннукьуй щутI къадуртун, ХIисав ласун къахьунсса.

* * * Вил ва ттул дянив дусса МикIирал ар дакъарив, Вин ва ттун ччан бикIарча, БачIва ччаннах ританну.