Гьашину январьданул 20-нний бувксса (№2) «Илчилий» жу бивщуну буссия ларгсса шинал декабрьданийннинсса дукиялухсса ва лаххиялухсса багьри.
Микку бувсун буссия ларгсса шинал багьри аьмну 4,4 процентрал лахъ хьуну бивкIшиву, республикалул статистикалул управлениялул сайтрайсса ккаккиярттайн бувну.

ХIасан Аьдилов
Статистикалул управлениялул ккаккияртту дакъашивугу хIисавравун лавсун, жу бусанну гьашину 3 зуруй багьрал хIакъираву хьусса дахханашивурттая.
Гьашину кIинттул ва интту дикI сайки ххира хьуну дакъар, цIанасса ппурттувугу бур дукIусса багьри: яттил дикI дур 250-280 къурушран кило, гъаттарал дикI – 280-300 къурушран. АьнакIив бур ца кило 120-135 къурушран. Оьлил нисирал багьа бур 200-300 къуруш, яттилсса – 500-800 къуруш. НакIлил багьа бур ттучаннай 50-55 куръушран 1 лит­ра, оьллу ябуллалиминначIа – 35-40 къурушран. Бартлил 250 грамм дур 150 къурушран. Ттучаннай бартлил 700-800 граммрал бадра бур 75-80 къурушран. Мура чIумал ссугъращи (Согратль) тIисса барт дур гава бадра 139 къурушран.
Жулламур дукиялул продукция кIилий ххирану дацIлай дур, дучIан дурминнуяр. Масалдаран, гара лаг­рулийсса Къабардин-Балкьарнал Нальчикрай дуккан дайсса барт (аьгъушиврул 30%) дур 76 къурушран, Дагъусттанналсса – 139 къурушран 800 грамм лагайсса бадра. Амма «Сагратль» тарт накI кьюркьуну дур тиха дучIайминнуяр – 50 къурушран 1 литралул къути, МахIачкъалаллалсса, Къизлардалсса, Нальчикралсса – 54-56 къурушран.
Лагаву МахIачкъалаллалсса цайминнуяр кьюркьусса дур – 200-220 къурушран ца кило. Цайми регионная дуркIсса лагаву дур 250-300 къурушран ца кило.
Ахъулсса личIину ххира хьуну дакъар, цайми регионная дучIайсса ахъулсса дур сайки жулла респуб­ликалий ххяххайминнул багьрай. Мура чIумал жулла ахънилсса тамансса ххирану дахлай бур. Масалдаран, помидорду жучIанна цIана Азирбижанная ва Туркнавату къадитлай бур, мунияту жулла­сса ххирану дахлай бур 120 къурушрая тIайла хьуну, 250 къурушрайн диянцIа. Нисварти бахлай бур 100-120 къурушран.
Чавахъругу личIину ххира хьуну бакъар, агьалинал чIявуну ласайсса сазан бур 120-150 къурушран, белый амур бур — 150 къурушран, судак цIана лап чансса бур бахлай – 200-250 къурушран. Ккунук­ру, февральданий цал ххирагу хьуну (160-180 къ.), уттигу кьюкьлан бивкIунни, цIана бур 30 ккунук 140-150 къурушран. МакIаронну, ппиринж, гречка ххира къавхьунни, цIанагу бур дукIуссаннул багьри.
ЛирчIми дукиялул багьри ливчIун бур дукIусса даражалий.