Май зурул 27-нний 1-мур ЦIувкIуллал школалий хъуннасса уттарашинна дия. Му так Махъра-махъсса занг рищаврицIун дархIусса дакъаяча, Совет Союзрал кIийла Виричу АхIмад-Хан Султаннул цIанийсса музей тIитIлай бия ва кьини.
Шяраваллил агьлу ва дуклаки оьрчIру бакъагу, чIявусса хъамалгу бия. Вайннавух Ккуллал райондалул финотделданул хъунама Кьурбан Амучиев ва райондалул музейрал хъунама ТIагьир Абакаров хIаласса вакилталгу бия.
Школалул директор Фируза ХIусайновал бувсуна, гьашину Ххувшаврил юбилейгу духьувкун, ЦIувкIуллал агьалинал аьмну Хъун дяъвилий дурсса гьурттушиннагу, Вирттаврал аьпалул хIурматгу лахъну бушиву ккаккан буллалисса музей буван дакIнин багьшиву. Шяраваллил жямат барча буллай, Кьурбан Амучиевлул школалунгу АхIмад-Хан Султаннул цIа дизансса маслихIат бунни.
АхIмад-Хан Султаннул оьрмулия бусласисса стендру дакъагу, дия ЦIувкIуллал школалул учительтуран-фронтовиктуран хас дурсса стендгу. Мукунна дия шяраваллил агьулданул – дяъвилул ветерантурал суратру дусса стенд. СВО-лий жанну харж дурсса 7 цIувкIрачунал суратру дусса баннергу.
Музейравува дуклаки оьрчIру кьамул бувна «АхIмадхановцы» кьюкьлувун, кIицI лавгуна ва аьдат цIакь хьунтIишиву.
АхIмад-Хан Султаннул оьрмулул ххуллия балжину бувсуна оьрус мазрал ва литературалул учитель, Дагъусттаннал лайкь хьусса учитель Ххадижат Ссаламовал.
«Жунма цинявннан кIулли АхIмад-Хан Султан, лакрал, Дагъусттаннал ва Къиримнал агьалинал акъагу, щалвагу Аьрасатнал пахрулунсса летчик-испытатель ивкIшиву. На пахрулий бура Виричунал оьрму уттисса никиран чувшиврул ва яхI-къириятрал эбратну хъанай бунутIий, жува хIакьину ванал цIанийсса музей тIитIаву адаврал ва инсаншиврул дарснугу хъанай дунутIий», – увкунни педагог Соня Кусаевал.
Хъирив учительтурал ва дуклаки оьрчIал Ххувшаврил темалун хас дурсса культуралул программа ккаккан дунни. ЦIувкIуллал оьрчIахь 56 шинай дарсру дирхьусса захIматрал ветеран Ильдарова Аьишатлул увкунни бюххансса балайрду. ОьрчIал асар хьунну дурккунни назмурду. Ккаккан бунни дяъвилул лахIзардал сценкарду.
ТIагьир Абакаровлул барчаллагь увкунни школалул коллективрахь, авадансса материалгу дартIун, ххуйсса даражалий музейгу хIадур бувну, ва тIитIаврил шадлугъгу дуваврихлу.
«Ттун материал датIин кумаг бунни ЦIувкIуллал Жяматийсса советрал председатель, профессор МахIаммадбаг ХIусайхановлул, барчаллагь тIий бура ванайнгу. Дагъусттаннал Чичултрал союзрал лакрал секциялул хъунама Супиян Оьмаровлулгу цала чулуха лакрал язисса арсурваврал ва душваврал суратру дусса баннерду пишкаш дуванна увкунни, мигу бусрав-барчаллагьрай кьамул дуванну. Музей ялу-ялун авадан хъанантIиссар, Вирттавран хас дурсса, пахрулунсса эскпонатру уттигу датIлантIиссару, хъиндайдихьу дурссар. Уттинингу жул школалий хьхьичIвама директор Илияс Мажидовлул сипталийну ва хIарачатрайну бувсса Тарихрал музей буссар, цIусса музей аьралий савлугъралмур хIисаврай бикIанссар. Жулва оьрчIан чара бакъа ппухълуннал Ватан дуручлай дурсса чувшивурттая хавар бикIан аьркинссар, цаягу лях гьан къаивтун, циняв фронтовиктурал биографияртту батIинтIиссар суратирттащалсса альбомравун, мукунма СВО-лий жанну харж дурминная, гьуртту хъанахъиминная оьрчIахь буслантIиссару, «Чувшиврул дарсру» дихьлантIиссару. АхIмад-Хан Султаннул оьрмулия ва аьралий ххуллия буслангу жу мудан хIадурссару, жулва буржри кьадрулиий ва кьиматрай ваная оьрчIахь буслан», – увкунни Фируза ХIусайновал.
АхIмад-Хан Султан кунмасса вирттаврал цIарду мяйжаннугу абадлий яхьунтIиссар, укун бюхъу-хъитлийсса директорталгу, учительталгу, агьлугу буссаксса. Ссавруннай жан дуллусса лачингу цIа-кьини бюхттулну ссавруннайва личIарчангу, ванал аьпа чIиви-хъунну абад буллалиссар ЦIувкIуллал школалий тIивтIусса музейралгу.
ПатIимат Рамазанова
