Шикку гьуртту хьунни Миллатирттал къатлул директор Сергей Ануфриенко, «Дагъусттан» МЦК-лул президент, техникалул элмурдал доктор, профессор Арсен ХIусайнов, «Дагъусттан» МЦК-лул вице-президент, медициналул элмурдал доктор Астемир Шайхалиев, медициналул элмурдал доктор Жаруллагь Аьшуев, хIакин Камалуттин Кьурбанов, «Дагестан» МЦК-лул дуллалисса циняв мероприятиярттай чялишну гьуртту шайсса, Тула шагьрулия бувкIсса хIакин Зарема Аьлиева, М.Илиясовал цIанийсса «Дараччи» ихIсандалул фондрал Москавлийсса филиалданул вакилтал ПатIимат Садикова ва Шавлукь Илиясова, «Илчи» кказитрал отделданул редактор Андриана Аьбдуллаева, искусствовед-этнограф ПатIимат ХIаммадова, Мукьардал шяравасса ватанчи Исмяил МахIаммадов.
Вайннал бунни Ххадижатлул оьрмулул ва захIматрал ххуллия, ванил жяматийсса давурттая бусласисса ихтилатру. Презентациялия бавну бувкIун бия Москавлий ялапар хъанахъисса чIявусса лак – ЧIяйннал, Бархъаллал, Ккурккуллал, ЦIуссалакрал, Чапаево ва цаймигу шяраваллавасса.
Дачин дурну ия мероприятие Стоматологиялул клиникалул директор, Щардал шяравасса Рамазан ЦIаххаев. Шикку ккаккан дунни Дагъусттаннал луттирду итабакьай идаралул редактор, Дагъусттаннал халкьуннал чичу, филологиялул ва философиялул элмурдал доктор Хизри Илиясовлул ва Дагъусттаннал Чичултрал союзрал лакрал секциялул хъунама, шаэр Супиян Оьмаровлул Ххадижат барча буллалисса ва ванил творчествалун кьимат бишлашисса слайд-шоу. Хасъсса аьралий операциялул къучагътуран хас бувсса Ххадижатлул мукъурттийсса Лариса ХIажиевал балайлухун экрандалия ккаккан дунни жанну дуллусса лакрал вирттаврал суратру. Миннал аьпалун баян бунни минутрайсса пахъ багьаву. Мероприятиялул лагрулий мукунма ккаккан бунни Москавлий Ххадижатлул дихьлахьисса лакку мазрал дарсирдал лахIзарду. Авторнал назмурду дурккунни ЧIяйннал шяравасса ПатIимат МухIуттиновал ва дуклаки оьрчIал. Цала зумуну мажлис чIюлу бунни Жаруллагь Аьшуевлул. Ирина МахIаммадоващал архIал ванал увкунни Ислам МахIачевлун хас бувсса Ххадижатлул мукъурттийсса балай.
Ахирданий Ххадижатлул барчаллагь увкунни ва мероприятиялул сиптачи хьусса Арсен Буйдалаевичлухь ва цинявппа цила кьини хъун дан, чIарав бацIан бувкIминнахь.
Хъиривсса фуршетрай мероприятиялул гьурттучитурал ххал дунни Ххадижатлул цила дурсса дукьрахIангу, ПатIимат Садикьовал аьрайн-гьавккуригу, цайми лакку дукрардугу.
Арсен ХIусайнов: ХIакьинусса мероприятие жула диаспоралул оьрмулуву дакIний личIансса ишну хъанахъиссар. Ванил сававчи Ххадижат ЦIаххаевал дурагу ххюра шинни Москавлий ялапар хъанай. Ва чIирисса чIумул дянив ца аьй къадучIанну Обороналул министерствалул медициналул идаралийсса бигьа бакъасса пишалул давугу дуллай, жяматийсса иширттавухгу чялишну гьуртту шайссар Ххадижат. Ччя-ччяни бияйссар ва щавурду дирсса аьралийтурачIан личIи-личIисса госпитальлайн. Ванил сипталий ва сакиншиндарай цимилагу гьан бувссар аьрайн гуманитар кумаг.
Астемир Шайхалиев: На махIаттал хъанан икIара мажал бакъасса москавуллал оьрмулий цукун чIун лякъайссар Ххадижатлул цила жаваблувсса пишалул даврицIун хъуннасса жяматийсса даврил хъаргу лахъан тIий. Обороналул министерствалийн хъарсса цуппа зузисса медициналул идаралул къуллугъчитурайн бувккун, кIулми ишла бувну, ванил Дагъусттаннаясса щавурду дирсса чIявусса аьралийтал ххуйсса шартIру дусса кIанттурдай уттубишин бувссар. Миккугу миннах цIимилийсса аякьа дан бакIцIуцIаву дурссар. Хъуннасса агьамшиву дусса цамургу даву дуллай бур хIакьину Ххадижат. ЦIана, хъунмур никирал инсантал лаглагиссаксса, мискин хъанай дур Ккавкказуллал, Дагъусттаннал мюрщи миллатирттал культура. Укунсса чIумал миллатрал мазрай чичлачисса шаэрнал кьадру-кьимат хъунмассар, ниттил мазрал дарсру дихьлахьисса, жула культурагу, аьдатругу ядан хIарачат буллалисса педагоггу бусравссар. Ва даву дан хъуннасса ссавур ва гьунар аьркинссар.
Андриана Аьбдуллаева
