Ккуллал шяраву школа тIивтIуния шиннай бартлаглай дур 90 шин. Му зунттавусса лакрал миллатрал шагьрулун ккаллисса шяраваллил культуралул тарихраву агьамсса ишну хъанай бур.Цал бакIраяту ва кьинилун хас дурсса мероприятияртту дуван хIукму бувну буссия май зуруй. Амма, дувансса хIадуршиннарду чIярусса душиврийн бувну, хIукму хьуну бур сентябрь зуруй дан.
Ва школалул тарихрацIун дархIусса макьалартту ва суратру гьарза-гьартану рищунсса пикрилий бур «Илчилул» редакция. Шиккува кIицI бан, Дагъусттаннай яла чIявуми «Илчи» кказит буккултгу Ккулув буссар. Шагьрурдай, шяраваллаву яхъанахъисса Ккуллал 1-мур школалий дуклай бивкIсса, зий бивкIсса инсантуралгу цала дакIнинбичавуртту кказитрайн гьан дуварча, хъиннува лайкьри.
1912-ку шинайнин Ккуллал жяматрал оьрчIру буккин-чичин лахьлай бивкIун бур шяравусса мизитирттачIасса школарттай. Яла 1912-ку шинал Щурагьиял округрал губернатор Кривенкол ихтияр дуллуну дур Ккуллал шяраву 15 оьрчIансса светский школа тIитIин. Вай оьрчIахь дарсру дихьлай ивкIун ур Дюкъуллал шяравасса Баг-Агъа тIисса учитель. Хъиривсса 1917-1918-ку шиннардий школа зий бивкIун бур Мавраев Шахру тIисса, 1-мур ЦIувкIратусса, учительнал каялувшиврий. 1924-ку шинал тIивтIуну бивкIун бур байбихьулул кIулшиву дулайсса школа. Ва школалул цалчинма учительну ивкIун ур Аьбдул Къаранов тIисса Мащихъиял шяравасса учитель. Буккин-чичин лахьхьин буллай бивкIун бур аьраб мазрай. Яла 1928-ку шинал Ккуллал ва Лакрал районнаясса 24 ялун учительталну зунсса жагьилтал гьан бувну бур Щурагьун латин хIарпирдай дарсру дихьлан лахьхьин буван. Хъиривмур 1929-ку шинал ххюва классрал оьрчIаща дуклан бюхъайсса школалул къатри дузал дурну дур. Вана ва шинаяту шинмай байбихьлай бур Ккуллал школалул тарихгу.
Цалчинсса латIин хIарпирдайсса учебникру бувкIун бур школарттайн 1929-1930-ку шиннардий.1934-ку шинал школалия бувну бур арулшинал школа.
Учительтуравасса цалчинмур хъамитайпану бивкIун бур Атаева Аминат, яла Мирзаева Шюъбанат ва Абакарова ПатIимат.1938-1939-ку шиннардий школалия бувну бур дянивмур даражалул школа. Амма дяъви байбишайхту, мадарасса учительтал дяъвилийн бувцуну бур.
Мунияту школалия цIунилгу бувну бур арулшинал школа. Вания гихуннаймур кIулшиву ласун Ккуллал оьрчIру лаглай бивкIун бур ЧIяйннал шяравусса школалийн. Мунияр махъ, 1952-ку шинал, цIунилгу бувну бур дянивмур даражалул школа. Школалий дарсру дихьлай ивкIун ур 41 учитель. Дуклакисса оьрчIал сияхIгу диркIун дур 500-ннийн бивсса.
1960-ку шинал оьрчIал сияхI дирну дур 1000-ннийн. Мунийн бувну Ккуллал колхозрал харжлугърах бувну бур 8 классрал оьрчIансса къатри.1974-ку шинал школалий дуклаки оьрчIал сияхI лархъун дур 1600-ннийн. Му шинал мукунма колхозрал арцух бувну бур шяраваллил цамур чулий мяйра шинал школа.
ЦIана Ккуллал шяраву бур кIива школа. Жува ихтилат буллалисса Ккуллал 1-мур школалун Аьрасатнал Виричу Халид Мурачуевлул цIа дирзун дур.
Ккуллал 1-мур школалий хъинну ххуйсса кIулшивурттугу ларсун, дунияллийх ппив хьуссар чIявусса оьрчI-душру. Мунияту на уттигъанну лавгссияв Ккуллал 1-мур школалийн цукунсса хIадуршинна дуллай дурив кIул дуван. Ттухь школалул 90 шин шаврил хьунийн дуллалисса ва дувантIисса давурттая бувсуна школалул завуч Рамазан Маммаевлул:
— Жу цал дакIнийсса давуртту бартдигьин хьурча, юбилейрал мероприятияртту данну тIий буссияв май зуруй. Амма бувчIунни ми циняв дузал дуван къахьуншиву. Мунийн бувну хIукму хьунни сентябрь зуруйн ласун. ЦIакь дурсса программа дуссар жул. Мунин цIагу дизарду «Жул школалун 90 шин». Циняв дуван дакIнийсса давуртту кIицI къадарчагу, кIицI данна цаппара. Школалий чIярусса шиннардий зий бивкIсса учительтурал сияхI хIадур дуллай буру, ххуйну дуклай бивкIсса оьрчIал сияхI дуллай буру, сакин буллай буру «Школалул тарихрал лу». Дуклаки оьрчIал дянив хьунтIиссар школалул тарихрацIун дархIусса конкурсру, сочиненияртту чичаву. Дур цаймигу дувансса давуртту. Нюжмардий цал батIару дурми давурттая бусан ва дуванминнуя ихтилат буван.
