[dropcap]В[/dropcap]ай гьантрай Ккурккуллал шяраваллил библиотекалий хьунни библиотекалул ва культуралул къатлул зузалтрал цачIу хIадур дурсса, Мариян Илиясован хас дурсса, мероприятие. Шикку гьуртту хьунни школалул учительтал ва дуклаки оьрчIру, шяраваллил жямат. Хьунни Марияннул цIаницIун дархIусса луттирдал выставкагу.
А. Аьбдуллаева
Ванил оьрмулия ва ххаллилсса давурттая бувсунни Даниял Магьдиевлул. «Халкьуннал цIаний бувтсса оьрму» ва «Халкьуннал дакIурдиву ливчIсса Мариян» тIисса луттирдаясса ихтилат бунни библиотекалул хъунмур Сияли Аьбдуллаевал.
Жула миллатрал тарихрая бусласисса ва лакку мазрацIун бавхIусса масъалартту гьаз буллалисса ихтилат бунни шяраваллил культуралул къатлул художествалул каялувчи Аймисай Аьбдуллаевал. Хъирив дуклаки оьрчIал дурккунни Марияннун хас дурсса Даниял Магьдиевлул назмурду, мукунма дурккунни Марияннул хIарачатрайну итабавкьуну бивкIсса ниттихасса шеърирдал жужравасса назмурдугу.
