[dropcap]Н[/dropcap]южмаркьини Лакрал театрдануву хьунни Дагъусттаннал халкьуннал чичу Мирза Давыдовлул оьрмулун 80 шин бартлагаврин хас бувсса
юбилейрал мажлис.
[dropcap]М[/dropcap]ажлис тIитIлай, Дагъусттаннал Чичултрал союзрал хъунама МахIаммад АхIмадовлул кIицI лавгунни Мирза Давыдовлул дагъусттаннал литературалуву бугьлагьисса кIану.
ЦIуссалакрал райондалул бакIчи ХIажи Айдиевлул кIицI лавгунни чичул творчествалуву агьамсса кIану бувгьуну бушиву 1999 шинал ЦIуссалакрал райондалий хьусса иширттал, Дагъусттаннайн къачагътурал кьюкьри ххяххаврия бусласисса «БивкIулийн лажинну» тIисса трилогиялул кIилчинмур бутIа хас бувну бушиву ЦIуссалакрал райондалий хьусса дяъвилул иширттан.
ЦIуссаккуллал школалул дуклаки оьрчI Султанов Батирханнул дурккуна ЦIуссалакрал райондалул делегация Къирим Республикалул Сакскаллал райондалийн уссушиврийсса аьрххилий лагаврин хас дурсса Мирза Давыдовлул назму.
«Дараччи» фондрал хъунмур Гулшан Хасаевал Мирза Давыдовлухь барчаллагь увкунни клубрал чIарав ивкIшиврухлу.
Чичу барча уллалисса ихтилатру мукунма бунни Лакрал райондалул администрациялул бакIчинал хъиривчу Макьсуд Кьадиевлул, Дагъусттаннал халкьуннал шаэр Сугъури Увайсовлул, «ЦIубарз» журналданул редактор Хизри Илиясовлул, Чичултрал союзрал лакрал секциялул каялувчи Илияс МахIаммадовлул, шаэр Даниял Магьдиевлул ва цайминнал.
Дагъусттаннал лайкь хьусса артистка Фируза Рамазановал бувккунни Мирза Давыдовлул «Ккурккуллал Щаза» тIисса пьесалувасса монолог. Шаэрнал мукъурттий балайрду увкунни Лакрал театрданул артистурал ва цаймигу балайчитурал.
Мажлис бачин бувну бия Дагъусттаннал халкьуннал артистал Шамсуттин Къапланов ва Луиза Шагьдилова.
ПатIимат Шихшаева
