КIуллив зун зукка цукун ритайссарив?
Гьар шинах ЦIуминалийсса ЦIуссаккуллал № 2 школалий лахъа-хъунну кIицI лагай Ниттил мазрал байрандалул кьини. Байран цурдагу ца кьинисса къадикIайча, февраль барз бучIайхтува, байбишай мунин хасну личIи-личIисса мероприятияртту дуллай.
Гьашинугу цал Ниттил мазрал нюжмар дунни: тIиртIусса дарсру, викторинарду, лакку мазрайсса «Цума уру миллионер хьун ччима?» тIисса тIуркIу, чIирал кказитирттал конкурс, назмурдал конкурс ва укуннасса цаймигу давуртту. Хъиривмур нюжмардий дунни Ниттил мазрал фестиваль: шеърирдал, магьрал, пьесардал, саннардал конкурсру, инсценировкартту, миллатирттал аьдатру ккаккан дуллалисса бяст- ччал.
Шиккува кIицI лаганна, шеърирду, ца лакку мазрай бакъагу, цайми миллатирттал мазурдийгу ккалай бикIайссар. Ххуйсса гьурттушинна дувай кIицI ларгсса мероприятиярттай яруссаннал маз лахьхьин буллалисса учительтуралгу. Вай цинявппа номердава язимири Ниттил мазрал байрандалий ккаккан буван язи бувгьуссагу.
Хъамал кьамул буллай бия миллатирттал лаххиярдавусса душру ва оьрчIру. Школалул фойелуву ттатта-бавахъал пишарду ккаккан буллалисса мурцIу бия: кув ппал дюхлай, кув зукка ритлай, кувгу уссал усттарнал даву дуллай, ягу нигьирттай къама гьаллай. Гьаннайсса, оьна авцIусса цукIуй акъая. Спортзал ниттил мазрайсса чичрурдал плакатирттал, стендирттал чIюлу бувну бия. Лакрал чичултрал луттирдал выставкагу дия, лакрал тIахIни-кIичIулул, ичIаллил кьай- кьуйлул мурцIугу бия. Ккаккиялун дишин лайкьмур бавахъал буттукьирттава дуккан дурну дия.
[dropcap]М[/dropcap]ероприятиягу дайдирхьуна лакрал ва яруссаннал фольклорданул группардал халкьуннал аьдатру ккаккан дуллалисса номердания. Гьуртту хъанай бия миллатирттал лаххиярдавусса учительтал ва дуклаки оьрчIру. Ччергъилттухун балайрдугу увкуну, миннал хъамал хъамалу буван дуканмунил авадансса урцIив хьхьичI дирхьуна. Хъамаллуравух бия райондалул КIулшиву дулаврил управлениялул методист Шагьмарданова Мисиду, Культуралул управлениялул зузалт Аьли Абакаров, Аьйша Жабраилова, МахIаммад Аьлиев, Аьйшат Къаллаева, Дауд Кьурбанов, лакрал балайчитал Ямлихан ХIажиев ва Рафик Сулайманов , шяраваллил бусравсса хъами Оьмаева Тамара, Рамазанова Уммужигьан, МахIаммадова Ханум.
Дуклаки оьрчIал бувккуна шеърирду лакку мазрайгу, яруссаннал, агъуллал, рутIуллал, даргиял, лазгиял, азирбижаннал мазурдийгу. Музыкалул гьунар бусса дуклаки оьрчIалгу цавувасса пагьмурду ккаккан бувна: Маммакуев Шяпинал, мандолинагу бивщуну, лакрал лахъи балай увкуна, АхIмадханов Сиражуттиннул тIурчарив, дачIулийсса «Зунттал макьанну» тIисса композициялул бавтIцириннал дакIру таза дуккан дуруна. Школалул «Щаращи» тIисса ансамбльданул миллатрал нукIузаманнул къавтIаву дуруна. Шамилчинмур классрал дуклаки оьрчIал паргалну ккаккан бувна «Алши бакъу» тIисса магьлувасса парча.
ЦIанакул шагьрурдай ниттил мазурдил дарсру дихьлай бухьурчагу, зукка цукун ритайссарив, ппал цукун дюххайссарив къакIулсса ва ппухълуннал пишардая хаварвагу бакъасса ник хъунна хъанай дур. Хъинну хьунссия, икьрал дурну, ихтияр ларсун, шагьрурдайсса ниттил мазурдил учительтураща ва оьрчIащагу уку-укунсса байраннай гьуртту хьун шайсса бивкIссания. ЦIакь шаванссия лакрал кувннал кувннащалсса дусшиврул арарду, оьрчIангу байрандалиясса асарду яла хъинмур ниттил мазрал дарс хIисаврай дакIний личIаванссия. Ва иширах къулагъас дуванхьуви КIулшиву дулаврил министерствалул биялдарай зузисса Ниттил мазурдилсса буллалисса ассоциациялулгу.
