Ларгсса нюжмаркьини оьрмулул 85 шин бартларгунни Дагъусттаннал халкьуннал артистка Буттаева РайхIанат Аьбдуссаламлул душнин.
РайхIанат Буттаевал юбилей барча дан лавгунни Дагъусттан Республикалул культуралул министрнал хъиривчу Мурад ХIажиев, Лакрал театрданул каялувчи Бадрижат МахIаммадхIажиева, директор МахIаммад ХIусайнов ва хъунама режиссер Аслан МахIаммадов.
Зулайхат Тахакьаева
Мурад ХIажиевлул, барчагу бувну, РайхIанатлун буллунни Культуралул министерствалул чулухасса Барчаллагьрал чагъар, республикалул театрал магьирлугъ хьхьичIуннай давриву бивхьусса багьа бакъасса захIматрахлу. ЧIярусса шиннардий сахIналий бувсса къуллугърахлу Бадрижат МахIаммадхIажиевал пишкаш дунни лишан «Факел искусства» ва премия.
РайхIанат Буттаевал хъамаллуращал дакIнийн бивчунни жуятува батIул хьусса даврил уртакьтал, гастроллайсса аьрххирду, цила лас, Дагъусттаннал халкьуннал артист ХIасан Буттаев.
Дурсса къулагъасрахлу барчаллагь увкунни Культуралул министерствалухь ва театрданул каялувчитурахь. Аьзизсса театрданун чIа увкунни тIайлабацIу.
(РайхIанат Буттаеващалсса ихтилат бищунну хъиривмур номерданий).