Тталаткьини Гъумучиял клубраву хьунни цIусса дуккаврил шинан хас дурсса кIулшиву дулаврил зузалтрал август зурул совещание.
Райондалул бакIчи Юсуп МахIаммадовлул кIицI лавгунни ДР-лул Республикалул ялун бучIантIимунилгу, жяматрал иш бачаврилгу хъунмур бияла хъирив нанисса никирал кIунттихь бушиву – цуксса диял хьусса дурив му ник кIулшивуртталгу, рувхIанийшиврулгу, мяърипатралгу – мунин лавхьхьусса бикIайшиву тIайлабацIугу.
Бувсунни билаятралгу, республикалулгу бакIчитурал кIулшиву дулаврихсса къулагъас шиная шинайн ххи дуллай бушиву. Мунил ялув щурущи дуллай бушиву цIу-цIусса федерал ва регионал программартту, ми программарттаву гьурттушинна дуллай бушиву Лакрал райондалул школарттугу. Республикалул БакIчинал сукку дурсса «150 школа» тIисса программалувун ларгсса шинал багьну бур Щардал ва Хьурттал школартту, гьашину багьан тIий бур Ккурккуллал ва ЧIурттащиял школартту. Шяраваллал ва мюрщи шагьрурдал школартту хьхьичIунмай баврил цIаний щурущисса «Лябуккулул аьш» тIисса» программалувун багьну бур Гъумучиял ва КIундиннал школартту. Райондалул кIулшиву дулаврил оьрмулуву махъсса 20-25 шинал лажиндарай хьунтIисса ххарисса ва агьамсса ишну Юсуп МахIаммадовлул кIицI лавгунни ттизаманнул тIалавшиннардацIун бавкьусса даражалул школа шинал ахирданийнин тIитIинтIий бушиву Гъумук.
КIулшиву дулаврил управлениялул каялувчи Явсупи ХIамзаевлул гьарза-гьартану бувсунни ларгсса дуккаврил шинал хIасиллая ва ялунсса шинал хьхьичI бихьлахьисса мурадирттая, гьунар бусса оьрчIащалсса даврия – райондалул дуклаки оьрчIал республикалул олимпиадарттай ва конкурсирдай дуллалисса гьурттушиндарая, учительтурал пишакаршиву ларай даврия.
ХьхьичIунсса ккаккияртту хьун дурсса педагогтуран райондалул администрациялул чулуха дуллунни хIурматрал грамотартту ва арцуйнусса бахшишру.