[dropcap]О[/dropcap]ктябрь зурул 30-нний Ккуллал райондалул администрациялул залдануву хьусса шяраваллал бакIчитуращалсса батIаврий райондалул
бакIчи Шамил Рамазановлул кIицI лавгунни шяраваллал генерал планну дакъассаксса, инсантуран цIусса къатри дувансса аьрщи дулун къахъанай бушиву.
Мунийн бувну райондалий зий бусса бия топография дувайсса пишакартал. Яла бувсуна цува ларгсса нюжмардий хьунаавкьушиву МахIачкъалалив Дагъусттаннал вице-премьер ХIажимахIаммад ХIусайновлущал ва цаймигу къуллугъчитуращал.
Налогру дулаврил чулуха Ккуллал район хьхьичIми ххуттардий душиврийн бувну жухрагу вичIи дихьлан бивкIшиву бувсуна. Такну кIицI бувна райондалий бувантIий бушиву бакIлахъия даххан, салкьи дуван бюхъайсса логистикалул центр, му бувайхту, шагьрулийн къалавгунма, жула бакIлахъия шиккура даххан хъанантIий душиву. Бувсуна мукунма Гъумучату Ваччав биянсса ххуллу ялунчIил асфальт бавкьуну къуртал бувантIий бушиву, Вихьлив буллай бачIину ливчIсса школагу буллантIишиву.
Ххал бивгьуна батIаврий цаймигу масъалартту.
