Апрельданул 3-нний КIундиннал шяраву хьунни Цалчинсса хъарасрал байран. Мунил хъар гьашину лархъунни Хасаврай ялапар хъанахъисса ХIажи ва ПатIимат Жабраиловхъал кулпатрал. Буттал буттахъая шиннай жуйнна дирсса аьдат гихуннай щаллу дувансса ниятрай ХIажинал кIулссанува лавсъссия Кьуру, амма дукIу, цайми-цайми кIанттурдай кунна, КIундивгу, пандемия сававну, Хъурдаккаврил байран къадурна ливчIссия.

ХIажинал дуллалисса байрандалул кьини хъун дуван бавтIун бия личIи-личIисса кIанттурдай ялапар хъанахъи­сса кIундимигу, хъамалгу, лагмащархъал вакилталгу.
Шяраваллил зума-къира­гърайсса Укъурухалу тIи­сса кIанайн бувккун, багьайсса аьдат-эбадатругу дурну, дуаьрдугу дурккуну, цалчинсса хъарасрал щару бивчуна Хъун хъузалал. Шиккува хьуна спортрал бяст-ччаллу, миннуй ххув хьуминнан дуллуна байрандалул агьаммур лишанну хъанахъисса бартри ва личIи-личIисса бахшишру. Хъуними ва мюрщими тяхъа буллай, лечлай бия КIундиннал шяраваллил хъунил хъатIул ца бутIану хъанахъисса «кьяцри».

Авлахъраймур аьдат щаллу дурну махъ шяраваллил культуралул къатлуву, цIарай, ла­кку гьавалий цIигьур ХIажи Аьбдуллаевлул бувсса нахIусса пулаврая тIайла хьуну, личIи-личIисса дукрардал авадансса столлах лахъи лавгуна мажлис. Му бачин бувну ия КIундиннал дянивмур даражалул школалул учитель, шяраваллил советрал депутат Пазир Узданов. Махъру лавхъуна бусравсса хъамаллурал: Лакрал райондалул счетный палаталул председатель Явсупи ХIамзаевлул, терроризмалийн къарши бацIаврил отделданул хъунама МахIаммад Гадаевлул, Хасавюрт шагьрулул мажлисрал депутат АхIмад Кьурбановлул ва чIявусса цайминналгу.
Шяраваллил жяматийсса оьрмулуву, дуллалисса давур­ттаву хьхьичIунсса гьурттушинна, чIарав бацIаву дуллали­сса кIундиннан, дуккавриву ва спортраву хьхьичIунсса ккаккияртту хьун дурсса КIундиннал школалул дуклаки оьрчIан дуллуна грамотартту ва бахшишру. Лахълахъисса мукъурттил лях-карах щаллу буллалисса музыкалул номердайну мажлис чIюлу бувна лакрал машгьурсса балайчитал Гьажар Рамазановал, МахIаммад-Расул ХIусмановлул, Халисат Батирбековал, Рамил КьурбанмахIаммадовлул, Ибрагьим Рабадановлул, КIундиннал шяравусса Аслийсса культуралул центрданул директор Даниял ХIажиевлул ва художествалул каялувчи ХIалимат Юсуповал, Арсен Багуновлул, Сабир Ясулбуттаевлул. КIундиннал школалул дуклаки душварал ккаккан дуруна лакрал, гуржиял ва цаймигу миллатирттал къавтIавуртту.

ЯлунчIил Хъурдаккаврил байран дуван Кьуру лавсунни Москавлив ялапар хъанахъисса ишбажаранчи ТIайпуров Захар ТIайпурдул арснал.
КIундиннал шяраваллил дур ялуннинсса Кьуру лавсманачIан шаппайн барта ларсун лагайсса аьдат. Гьашинугу мукунма, дуки-хIачIиялущал, Хъунна Бартлущал лавгунни Захар ТIайпуровлул къушлийн. ХьхьичIра укун ларсун лагайсса Барта инсаннал чурххал лахъшиврийссагума дувайсса диркIун дур. ЦIанакулгу, муксса дакъахьурчангу, диялну хъуннасса, хасну ва аьдатрансса Барта дурну дия. ХьхьичIара, ва аьдат щаллу дуллалийни, хъаннийн бахшишран каршивгу дичай­сса диркIун дур. ЯлунчIил хъарас щун наниманал цин лархьхьусса хIадуршингу дурну, балайрдащалсса, къавтIавурттащалсса мажлис сайки хьхьудяризаннин лахъи лавгуна.
Байрандалийн бувкIми цинявппагу рязину ливчIунни.

– Ва дур буттал бутта­хъая жуйнна дирсса аьдатирттавасса ца. Шай ихтилатру, ва ссан аьркинссар, дукьан дуван дур тIиссагу. Ттул пикрилий, ва аьдат кьаритан цукунчIав къабучIиссар, ялуннагу ваниярдагу гужну, гьарта-гьарзану щаллу дуллан аьркинссар. Цанчирча, укунсса батIавурттал жямат хъиннува дусгу, цачIунгу буллалиссар, личIи-личIисса кIанттурдай ялапар хъанахъисса инсантал цал ххишалану куннан кув ккаклакиссар, къакIулми кIул буллалиссар. Цува, Дянивмур Азиянаву ялапар хъанай, махъ Хасаврай мина дирхьуну, Лаккуй яхъанай къаивкIнугу, хушрай Кьуругу лавсун, хъинсса даву дунни ХIажинал, – тIий ур отставкалийсса полковник Аьли Аьбдуллаев.
Ва кьини дурсса ххуйсса дуаьрду, лавхъсса махъру тIайла бацIаннав, авадансса даркьусса шин хьуннав. Амин.