Хъаннин та-духьурчагу, ялапаршиндараву, зана-кьулу­шиннараву, арамтураннияр чIярусса затру дикIай аьркинну, чIюлушиннарду тIий, косметика тIий. Къачансса арцу харж шай, хаснура интту ва ссуттил, капрондалул колготкардах, 200-300 къуруш дуллуну лагу-ларсун, цал ларххун ягу цал лахханнинна ттирхь увкуну, ппив хьуну ларгун. Бусанну цаппарасса кьяйдарду, кIюласса колготки хъунма­сса хIаллай дияншиврул, кулпатрал бюджетрай къия къахьуншиврул щаллу буван бигьасса ва вихшала дишинсса.

Капрондалул колготки-жуларду хъунмасса хIаллай дияншиврул

ЦIуну ласайхтура капрондалул колготки, атил дурну, хьхьирцIуну, ца хьхьу-кьинисса дишияра морозильникраву, целлофан кьуцурттувугу дирхьуну. Морозильникрава колготкилущалсса кьуцури буккан аьркинссар ми лаххан ссятурдил хьхьичI, цанчирча ми цайнура цирда дассан дитан аьркинну тIий, дассан я бургъилу, я батарейкалий дишин къабучIину тIий. МикIлачIаврил капрондалул ва нейлондалул ххаллу цIакь дувайссар. Ва кьяйда совет заманнул хъанниву хъинну машгьурну бивкIссар.

* * *
ЦIуну ларсъсса колготки къеп цIилгу бассан бувсса щинавун дуртун, цаппарасса минутIирттайсса щарай диртун, кьакьан лахъира.

* * *
Колготки батарейкалий кьакьан дуллан къабучIиссар.

* * *
Капронну хъунмасса хIаллай диянссса кьяйдарду ишла бувну махъгу ми лахлахийнисса мугъаятшивруя хъамабитан къабучIиссар: лахлайна миннухун дахчинсса чIюлушин, кIисса-каниш тIий, цамур тIий, каруннай къаритаву, лахъисса михьурттихун дахкъачаву.

* * *
Колготки ччяни дуцаврил багьанану хьун бюхъайссар ми къабагьайсса, зулла дакъасса размерданул бакIрайн дагьавугу. Мукунна къумасса уссалгу ми ччяни тIатIан дувайссар.

* * *
Колготки ттирхь учаврин­сса багьанану шайссар бурчу кьавкьун, хъяхъа кусса нихъри, ххарттасса кару. Гъилисса щинаву аьваян бувсса, ссуку бувну, кIукIлу лаган бувсса ччаннайх, каруннайх хьхьурай крем дулуккира.

* * *
Колготки лахлан хьхьичI, бурчу кIукIлу лаган буван, ччаннайх ва каруннайх крем дулуккира.

* * *
Колготки най дуна дукъацавриву, лахъи къадуккавриву агьамшиву дуссар ми тIайлану лаххаврилгу.

* * *
Колготки, янна шюшай машиналувун къадирчуну, карунних шюлушара.

* * *

Колготки ттирхь увкуни

Михьирттайх дуккайсса лак. Колготкилий, ттирхь куну, «стрелка» хьуний, му, гихуннай къадачин, дацIан дувансса кьяйдарду къачанни. Ва ишираву чIяруну кумагран дучIаймургу дур ранг дакъасса лак. Мунил чIири шуша гьарцагу хъамитайпалул сумклуву дикIан аьркинссар.

* * *
СсахIван. Иш багьну, канилу лак дакъаний, бучIиссар ишла буван сайки гьарца кIанай – хъамалу лавгнийгу, шагьрулуву кафе-рестораннавугу бикIайсса, ссахIван. Му, цахъи атил бувну, ккутI хьусса кIанттайх бувккун, кьакьаннин бацIан аьркинссар.

* * *
КIизуйн пурх учайсса лак. Колготки ттирхь увкусса кIанайн лак пурх увкуну, кьакьан дитира. Мукунна лак бучIиссар колготкилул щалла лахъишиврий дуртIунугу, миннул оьрму лахъи буваншиврул.

* * *
Клей. Чагъар лачIун буван ишла дувайсса клейгу дучIину лякъинтIиссар ва ишираву. Мугъаятну, бурчуцIун къалачIунну, ттирхь увкусса кIанайх кIюласса къат хьунну дурккун, кьакьан ритан аьркинссар. Амма ва кьяйдалул дур цилла диялдакъашивуртту – цIансса колготкилий клей хъинну чIалан дикIайссар, мунияту ва кьяйда так чарабакъул ишла бувну хъинссар.