[dropcap]К[/dropcap]куллал райондалий бур учинсса школану хьунни Ваччав райондалул администрациялул кIанттул бюджетрацIух бувсса, 2017- ку шинал зун бивкIсса цIусса школа.

Дагъусттаннай совет хIукумат дирхьуну махъ Ваччав 1925-1926-ку шиннардий шяраваллил жямат­рал хIарачатрацIух бувну бивкIун бур цаппара классирттансса чIиви-кьивисса школа. 1939-ку шинал Ваччав хьуну бур арулла шинайсса школа. Буттал кIанттул цIанийсса Хъунмасса дяъви байбивхьуну махъ Ваччиял школалунгу тамансса захIматшивуртту хьунадакьлан диркIун дур.

[dropcap]Я[/dropcap]рагъ кIунттил бугьан шайсса циняв учительтал фронтрайн лавгун бур, миннан кIанттай дарсру дихьлангу лавайми классирттал дуклаки оьрчIру кIункIу бувну бур. Дяъвилия махъсса шиннардий район Лакрал райондалуцIун цачIун даврийну школалун чан-кьансса къулайшинна-илкиншиву хьуну дур, хьхьичIвасса райисполкомрал къатравун бизан баврийну. Та диркIун дур 1962-ку шин. Тания махъ, район махъуннай зана даврийну, цIунилгу Ваччиял школалун цIусса мина ххал дуллан багьну бур. Цукун-бунугу, анавархъиндарай, 1968-ку шинал школалунсса къат­ри дурну, гивун бивзун бур. Га шинал школагу дянивмур даражалул школалийн кIура баен бувну, ЧIяв школалийн заназисса Ваччиял ва СумбатIуллал дуклаки оьрчIру шиккунма занай, кIира сменалий дуклай бивкIун бур.
1969-ку шинал тIурча, хьуну дур Ваччиял дянивмур даражалул школа къуртал буллалисса кIива класс­рал цалчинмур выпуск, 38 оьрчI-душ бусса, 17 оьрчI, 21 душ. Школалул директорну ивкIун ур ПатихI Абакаров .
— На школалул директорну зий сайки 30 шин шавай дур, — буслай бур ДР-лул лайкь хьусса учитель Бажи Мирзаева. Цалчинмур выпуск хьуния махъ ттуйн бияннингу директорталну зий бивкIун бур 5 инсан.
Гьай-гьай, 50 шинал хьхьичI хьусса цалчинмур выпускрахь дарсру дихьлай бивкIсса учительтурава цIана школалий цаягу акъар. ТIайлассар, та цалчинмур выпускрал шиннардий зий бивкIминнава, ттун кIулну, 7 инсан ур – кув, пенсиялийн бувккун, бигьалаглагисса, кувгу цайми давур­ттай зун лавгсса.
Ваччиял школалий цалчин­сса выпуск хьусса шиннардий яла чIавама учительну зий ивкIун ур ЧIятусса, жуна цинявннан кIулсса Шалласу Шалласуев. Шалласу Рамазановичлул шикку зий 2 шин дурну дур. Муния махъ ванал бюхъу-гьунар ялунма чIалай, МахIачкъалалив пединститутрал райкомрал ихтиярданийсса комсомолданул секретарьну зун увцуну ур.

Тара 1967-ку шинал Ваччиял школалий дарсру дихьлан тIайла увккун ия Дагъусттаннал университетрал чил мазурдил факультет къуртал бувсса Ваччатусса МахIаммадхIажи Макьуев. Амма чIал къавхьуну мугу, Асадуллагьлул арс МахIаммадхIажи Макьуев, республикалул КIулшиву дулаврил министерствалул тIалавшиндарайн бувну, Дагъусттаннал пединститут­раву чил мазурдил кафедралий зун увцуну ур.
Цалчинмур выпускрахь мукуна дарсру дихьлай ивкIун ур цIана райондалул музейрал директорну зузисса ТIагьир Абакаров . Шикку зий кIира шин хьуну махъ ТIагьир дуклан лавгун ур. Муния махъ ЧIяйннал школалий ингилис мазрал дарсру дихьлай, хъирив райкомрай, райадминистрациялий зий уссия.
ЦIанасса чIумал 2-мур ЦIув­кIуллал школалий дарсру дихьлайна ур ДР-лул лайкь хьусса учитель ХIасан Чайхаев, цувгу 50 шинал хьхьичIгу Ваччиял школалий зий ивкIсса.

Пенсиярттайн бувккун, бигьалаглай бур Дагъусттаннал пединститутрал физматрал факультет къуртал бувния махъ зий 60-нния лирчусса шинну дурсса, ДР-лул лайкь хьусса учительница Аминат Кубачанова, Аьрасатнал Федерациялул просвещениялул отличница ПатIимат Мустапаева, Роза АхIмадова, ХIусайн ХIусайнов ва мукунма цаймигу.
Цалчинмур выпускрал дуклаки оьрчIава сайки цинявнналагу бивтун бур бусраврайсса 50 шинал оьр­мулул ххуллу.

А. Къянчиев