Апрельданул 18-нний Аьрасатнаву кIицI лагайссар Тарихрал ва культуралул гьайкаллахасса аякьалул кьини. Ванил лагрулий жулла республикалул культуралул волонтертурал дунни субботникру.

Тарихрал ва культуралул ирс, культура дуруччаву, вай мурадирттаха зузиминнал чIарав бацIаву хIисаврай дуллалисса давривух гьуртту хьунни «Культуралул волонтертал» тIисса жяматийсса суккушиндарал Региондалийсса сообществалул активистътал ва Культуралул министерствалийн багьайсса дуккаврил идарарттаву ккалаккими.

Волонтертурал, низамрайн дурцуну, лази-лакьи дурунни Расул ХIамзатовлун, Фазу Аьлиеван, Сулайман Стальскийн, Муэддин-Араби Джамаллун, Ирчи Къазаклун, АбутIалиб Гъапуровлун, Апанни Къапиевлун ва цаймигу чичултран ва художниктуран дацIан дурсса гьайкаллу. Гьарцагу гьайкалданучIа хьунни ванил залунная бусласисса лекция.

Ва кьини мукунна субботникру хьуна культуралул ирсирал объектирттан ккаллисса культуралул зданиярттачIагу, Хъун дяъвилул вирттавран ва къинттуллух зий бивкIминнан хас дурсса монументирттачIагу.