Ахънилсса зиянчитурая дуруччавриву кумаг шайсса бур тIутIайнугу. Ахъуву, чIавахьулттал лув ххуйшиврун дакъассагу, тIутIив дугьан бучIину бур ахънилсса дуруччингу, мукунна, цаппарасса ахъулсса дуруччингу, мурхьирдал лув.

Бархат-тIутIив

— Бархатцы тIисса тIутIая, нигьа бусайсса бур нувщуйн, помидорданийн, каландалуйн, чимусуйн, кьюнукьуйн, туртул гьаннарайн багьайсса зиянчитал ва цаппарасса азарду.
— Аьрщи дихлан, дугьлан хьхьичI му сагъ дуван, мунивусса медведкарду нигьа бусан буван ишла дувара бархатцы тIутIив: ми, мюрш дурну, аьрщарайх ппив дувара, яла дугьира дугьаймур.
— Бархатцылул настойрал тлярая буруччинтIиссар калан, хъюрув, гьивчул, бяълилул, кякандалул мурхьру, смородиналул ва крыжовникрал къатIри. Настой дуваншиврул, ласияра ми тIутIал аьрщараймур бутIа щала, секаторданул кумаграйну мюрш бувну, 40-60 градус гъилишиврул дусса щинал бадралувун дирчуну, кIива гьантлийсса дитияра. Диргьуну, миннул ялун дутIияра хьюмусса ссахIвандалул 40 грамм, пурхкулувун дуртIуну, 10 кв. метралийн 2 литра хIисавну, ца къатIуйн ягу 6 шин хьун дурасса ца мурхьиран 2 литра, 6 шин хьуния тинмайсса мурхьирдан 6-8 литра хIисавну пурх учияра.

Настурция

— Помидордал ва каландалул чIарав дургьусса настурциялул ми ахънилсса дуруччинтIиссар зиянчитурая.
— Настурциялия мюнпат буссар ахъулссаннул мурхьирдангу. Бяълилул, цIулитул, гьивчул мурхьирдал лув дугьияра ми тIутIив. Ссуттил чIумал бучIиссар ми тIутIив, дартIун, мюрш дурну, мурхьирал лагмасса ххунтIуллуву дуччин, миннуя хьунтIиссар ххаллилсса оьргъашиву.

КIяла тIутIи (ромашка)

— КIяла тIутIуйн (ромашка-пиретриум) тIабиаьтрал инсектицид (зиянчитал литIун байсса химиялул препарат) учай. Му тIутIи каландалул чIарав дургьуну хъинссар, ахънилссаннуйн багьайсса шатрая ва цамуниясса дайгьузанну хIисаврай.
— Мукунна кIяла тIутIи дургьуну хъинссар гьивчул мурхьирал лагмасса кюнтIуллувугу.

Календула

— Колорадуллал гъангъа­ратIуща духIан къашайсса дур календулалул кьанкь. Мунийн бувну ва тIутIи нувщул чIарав дургьуну хъинссар.
БучIиссар ахъ бугьан, ца ща нувщул, миннул чIарах ца ща календулалул тIутIал хIисаврай.
— Уттинин нувщи бувгьуну бухьурчагума, миннул чIарах вай тIутIив дугьан къачIалссар.
— Ссуттихуннай вай тIутIив дартIун, дуччара зува ялунчIил нувщи бугьан дакIнийсса аьрщараву.

Лаванда

Ва тIутIул ахъ битIикьукьулт­раща ва къатта нувцалуща буруччинтIиссар.

ХIадур бувссар
Бадрижамал Аьлиевал