Ниттил кьинилун хасну «Россия – моя история» тарихрал паркраву хьунни Украиннал аьрщарайсса хасъсса аьралий операциялий жанну харж дурсса аьралитурал ниттихъан ва мобилизациялувун багьминнал кулпатирттан хас дурсса акция «На балай тIий ура ниттиха» тIисса.

Му сакин дурну дия «Россия – моя история» тарихрал паркрал, Бизнесрал хъаннил ассоциациялул, Дагъусттаннал ниттихъал ккурандалул ва лавайми классирттаву дуклакисса оьрчIал советрал цачIуну.
Ва акция цурдагу сакин дурну дур властьрал ва жяматийсса ккураннал вакилтал цачIун хьуну, архIал Украиннал аьрщарай Ватандалул цIаний жан харж дурсса ва хIакьину тийх талатисса аьралитурал кулпатирттан кумаг буллансса мурадрай.
Патриот зумунусса акция дайдирхьуна «Жу гьаз хьунну» тIисса балайлуя. Ччясса мутталий халкьуннал балайлийн кIура бавсса Аьрасатнал жагьилсса балайчи Шаманнул (Ярослав Дроновлул) балай увкуна жула балайчи Мурад Хушлаевлул. Балайлух цинявннал вичIи дирхьуна лавай бивзун.
Хьунабакьаврий гьуртту хьунни властьрал органнал, миллатирттал иширттал политикалул, республикалул циняв диннал ккураннал, МахIачкъала шагьрулул ва жяматийсса ккураннал вакилтал.
Ватандалул мурадру буруччаврил ххуллий жанну дуллусса арсваврал ниттихъахь хIурматрал махъру увкуна тарихрал паркрал каялувчи Тимур Велихановлул, ДР-лул Халкьуннал Мажлисрал Миллатирттал политикалул, жяматрал ва диннал ккураннал иширтталсса буллалисса комитетрал вакил Елена Ельниковал, Дагъусттаннай оьрчIал ихтиярдал ялув зузисса Марина Ежовал, Дагъусттаннал муфтинал маслихIатчи Айна ХIамзатовал, Бизнесрал хъаннил ассоциациялул каялувчи, «Аьрасатнал нинухъру» ккурандалул вакил Сапижат МахIаммадрасуловал.
Арсру ливтIусса ниттихъал дакIру дансса махъру увкуна Аьрасатнал Виричу НурмахIаммад ХIажимахIаммадовлул ниттил Сапижат Мазаевал.