Декабрьданул 9-нний Каспийскаллал шагьрулул 3-мур школалул актовый залдануву хьунни ЮНЕСКО-лул 2019-ку шин бикIлил миллатирттал (коренных народов)
шинну баян бувсса иширан хас дурсса шадлугъ. Зал, му иширан хасну, чIюлу бувну бия дуклаки оьрчIал ва учительтурал.
Бадрижамал Аьлиева
[dropcap]Ш[/dropcap]адлугърай махъру лавхъуна: школалул директорнал хъиривчу Зарема Ссапарбековал, шагьрулул кIулшиву дулаврил управлениялул методист, лакку душ Снежана ЦIаххаевал, лакрал халкьуннал шаэр Мирза Давыдовлул, шаэр Сажид Камиловлул.
Ихтилатру буллалими чIурчIав дуллай бия, уттинин кунма, ттиния тинмайгу чIяву миллатру бусса Дагъусттаннай, щалагу Аьрасатнаву бавкьуну, нахIуну ялапар хъанан аьркиншиврий, оьрчIру цала миллатрал культура ххирану, цайми халкьуннал культурардал хIурмат буну хъуни буллан аьркиншиврий, ичIува оьрчIащал, оьрчIал оьрчIащал ниттил мазрай гъалгъа тIун аьркиншиврий.
Шадлугърайн оьвкусса бусравсса хъамаллуравух бия жула машгьурсса актриса балайчи Саният Рамазановагу.
Ва кьини сахIналийн буклакисса дуклаки оьрчIру буслай бия, РАН-лул Мазрал институтрал ккаккиярттайн бувну, Аьрасатнаву 150-нния ливчусса бикIлил миллатру бушиву, миллатирттал культура, багьу-бизу Аьрасатнал хъус-хъиншивуну хъанахъишиву.
Учительтурал ва дуклаки оьрчIал хIадур бувну бия Дагъусттаннал миллатирттал майданнугу. Лакралмур майдандалулсса бувну бия ва школалий лакку мазрал дарс дихьлахьисса Атта Ибрагьимовал. ОьрчIал дурккуна лакрал шаэртурал назмурду, увкуна лакку балайрду. Ва шадлугърайн лакку оьрчIругу, махъсса цайми миллатирттал оьрчIругу хIадур буллай, хъунмасса захIмат бивхьуну бур ва школалий дагъусттаннал литературалул дарс дихьлахьисса, ГьунчIукьатIрал шяраватусса Камилла ХIажиевалгу.
Цала къавтIаврил номерданийну шадлугъ чIюлу дуруна Каспийскаллал шагьрулул оьрчIал творчествалул центрданучIасса, жулва лакку душ РахIима Сулаймановал каялувшиндаралусса, «Зунттал оьрчIру» ансамбльданулгу.